Bütün Türkiyəni elektriksiz qoyan şəxs istefa verdi

Türkiyədə martın 31-də bütün ölkə boyu elektrik enerjisinin nəqli dayanıb.

Ölkə.Az Türkiyə mətbuatına istinadla xəbər verir ki, Türkiyə Elektrik Paylama Şirkətinin (TEİAŞ) baş direktoru Kamal Yıldır istefa verib.

Türkiyənin energetika və təbii ehtiyatlar naziri Taner Yıldız martın 31-də ölkədə baş vermiş elektrik kəsintisi ilə bağlı aparılan araşdırma nəticəsində mikrosaniyələr içində 5 enerji paylama sisteminin dövrə xaricində qaldığını deyib:

“Bir neçə neqativ faktorlar eyni anda baş verib və qısa müddət ərzində beş elektrik paylama xətti sıradan çıxıb. Şərqdən qərbə gələn xətlərin yükü sıxlaşıb. Bu, texniki qəza olmaqla yanaşı, həm də əməliyyat səhvi kimi qiymətləndirilir. Sistem özünü qorumaq istəyən zaman bunlar yaşanıb. TEİAŞ baş direktoru vəzifəsindən istefa verdi. Bəzi digər səlahiyyətli şəxslərin rolu da araşdırılır”’.

Nazir bildirib ki, Türkiyənin elektrik paylama şirkətinin (TEİAS) direktoru Kamal Yıldır istefa verib və şirkətin bir sıra əməkdaşları onların qəzada rolunun olub-olmadığının aydınlaşdırılmasına qədər işdən uzaqlaşdırılıb.

İstefanın ardından sualları cavablandıran Kamal Yıldır araşdırmalarını tamamladığını və nəticənin sistemin öz daxilindəki balanssızlığın meydana gətirdiyi qəza olduğunu və bunun nəticəsində sistemin çökdüyünü söyləyib.

Xatırladaq ki, Türkiyədə martın 31-də yerli vaxtla saat 10:36-dan etibarən Ankara və İstanbul kimi böyük şəhərlər də daxil olmaqla, bütün ölkə boyu elektrik enerjisinin nəqli dayanıb.

Rəşid Mustafazadə

Ölkə.Az