Bakıda "kitayski" Hindistan sərgisi...

Dünən rəfiqəm və bacı kimi çox sevdiyim Leyla Əliyeva ilə Amay Ticarət Mərkəzində keçirilən "Hindistan sərgisi"nə getmişdim.

Kaş ki getməz olaydım... Belə düşünmək üçün isə kifayət qədər səbəblərim var:

1. Satıcıların çoxu azərbaycanlılar idi və malların böyük bir qismi məncə elə Bakıda Pakistan malları satılan mağazaların malları idi;

2. Mallar ancaq satış üçün çıxarılmışdı və qiymətləri müasir devalvasiya və sakinlərimizin psixologiyası nəzərə alınaraq müəyyən edilmişdi, yəni yüksək idi. Pulu olmadığı üçün hər gün "ağlayan" camaatın da elə çoxu də bu malları alırdı. Qiymətinə belə baxmadan(!)

3. Mənim isə oraya getməkdə əsas məqsədim xına, sürmə, eləcə də hind ətirləri, suvenirləri ilə maraqlanmaq idi. Ancaq gülməli məqam o idi ki, 1 manata satılan xınanın içində daha çox hava var idi, nəinki xına. Bizimkilər (yerli satıcılar) artıq buna yəqin ki "əl gəzdirmişdilər".

4. Alıcıları avam yerinə qoymaq istəyən öz satıcılarımız az qala almaq istədiyim xınada belə məni aldadırdılar. Bizə deyirlər ki, xınanın istifadə müddəti 2 ildir, istehsal tarixi isə 2014-cü il, guya 2015-ci ilədək vaxt var, malın üzərinə baxanda isə istehsal tarixi "may 2013" yazılmışdı. Deməli, köhnə mal satılır və bu malın istifadə müddətinin bitməsinə cəmi 1 ay qalıb. Rəfiqəm Leyla mənə deməsəydi ki, bax malın üzərindəki istehsal tarixinə, "bura Azərbaycandır", indi əlimdə vaxtı 1 ay ərzində keçəcək xınalar qalacaqdı, yaxmağa başlar axtaracaqdım.

5. Sərginin girişi olan yerdə elan kimi astroloq və hiromant yazılmışdı. Bu da özlüyündə bir marketinq gedişatıdır. Yəni bilirlər ki, bizimkilər belə şeylərin vurğunudur, bir hindlini hiromant və astroloq qismində otuzdursaq, hər adamdan 30 manat istəsək, yaxşı qazanmaq olar. Özü də adam heç də az deyildi, hətta növbə də var idi.
6. Səslənən musiqi çox yüksək səsdə idi, yəni ağız deyəni qulaq eşitmirdi.

7.Sərgi mədəni bir tədbir olsa da, burada daha çox keçmiş "talkuçka" ab-havası sezilirdi. Çünki burada insanlarımız az qala digərlərinin üstündən keçir, ayaqlarını tapdalayır, satışa qoyulan malların olduğu stolu itələyirdi.

8. Ədalət xətrinə onu da deyim ki, arada bir gerçək hindlilər də gözə dəyirdi. Çoxu da rus və azərbaycan dillərini bilirdilər.

Son olaraq deyim ki, sadəcə hind rəqqasəsinin rəqsinə görə getdiyimə, vaxt itirdiyimə üzülmədim.

Ölkə.az