"GƏNCLƏRİN DAHİSİ" Milli Intellektual Yarışma başladı

4 aprel 2015 tarixində Bütöv Azərbaycan Ocaqlarının (BAO) təşkilatçılığı ilə “Gənclərin Dahisi” adlı milli intellektual yarışmasının ilk buraxılışı gerçəkləşdi.

Yarışma gənclər tərəfindən çox maraqla qarşılandı və dinamik keçdi. Yarışmada bir çox fərqli təhsil sahələrinin gəncləri - Azərbaycan Dövlət Neft Akademiyasının Neft-Qaz Qurğuları Mühəndisliyi fakültəsinin tələbəsi Orxan İsayev, Bakı Dövlət Universitetinin Filologiya fakültəsinin tələbəsi Qoşqar Əhmədov, o cümlədən intellektual gənc Elşad Tağıyev, Qaradağ rayonu 139 nömrəli məktəbin 11-ci sinif şagirdi Şəhriyar Məmmədzadə, 106 nömrəli məktəbin 11-ci sinif şagirdi Həsən Süleymanov və başqaları fərqlənənlər arasında oldu.

Yarışma BAO-nun Mədəniyyət Şöbəsinin Rəhbəri Elşən İsmayılın təqdimatıyla başladı. Yarışmanın birinci mərhələsi “tarixi şəxsiyyətlər” adlanırdı. Bu mərhələ zamanı öncədən nəzərdə tutulmuş 10 fərqli sual yarışmaçılara verildi. Bu mərhələdə biliyi və xüsusi bacarığı ilə Qoşqar Əhmədov digərlərindən seçilirdi. “Atalar sözü və aforizmlər” adlananan ikinci mərhələ də yarışmaçılar üçün çox maraqlı keçdi. Bu mərhələdə də Həsən Süleymanov digərlərindən fərqlənirdi.

Üçüncü mərhələdə suallar “Milli musiqimiz” mövzusundan idi. Mərhələ zamanı kompüterdən səslənən mahnıları yarışmaçılar çox həvəslə dinləyir, o mahnı ilə bağlı verilən suallara cavab verirdilər. Nəhayət, yarışmanın ilk üç mərhələsi bitdikdən sonra “duel” adlanan final mərhələsinə keçildi. Finala ilk üç mərhələdə biliyi və xüsusi bacarığı ilə fərqlənən Qoşqar Əhmədov və Həsən Süleymanov çıxdı. Çox həyacanlı və bir qədər stressli keçən “duel”-də rəqibindən müsbət mənada fərqlənən Həsən Süleymanov qalib gəldi. Sonda aparıcı Elşən İsmayılın təqdimatıyla Həsən Süleymanov təşkilatın xüsusi diplomu ilə və hədiyyə ilə təltif olundu.

Ölkə.az