İranla Türkiyə arasında diplomatik gərginlik

İran parlamenti Milli Təhlükəsizlik və Xarici Siyasət komitəsinin məruzəçisi Hüseyn Nəqvi Hüseyni ölkəsinə rəsmi səfərə gələcək Türkiyə prezidenti Rəcəb Tayyib Ərdoğan barədə ağır sözlər deyib.

Hüseyni bu səfərin ləğv olunmalı və ya təxirə salınmalı olduğunu deyib. “Ölkəmizi aşağılayan birinin ayaqlarının altına qırmızı xalça sərmək diplomatiyamız üçün utancvericidir. Hökumət Ərdoğanın İran barədə dediyi sözlərdən sonra bu səfərə izn verilməməli idi. Bu səfər ya ləğv edilməli, ya da təxirə salınmalı idi”.

Hüseyn Nəqvi Hüseyni, millət vəkillərinin Ruhani hökumətinin səfəri təxirə salmaması istiqamətində hər hansı bir addım atamamasına görə də narahat olduğunu deyib.

Qeyd edək ki, Ərdoğanın Yəməndə baş verən hadisələr zəminində İrana qarşı səsləndirdiyi bəyanat iki ölkə arasında gərginliyə səbəb olub. Belə ki, Türkiyə prezidenti, “İran və terrorçular Yəməndən çıxmalıdır” deyib və baş verən hadisələrə müdaxilə edən ərəb koalisiyasına dəstəyini ifadə etmişdi.

Bu arada Türkiyənin xarici işlər naziri Mövlud Çavuşoğlu İranın məzhəbçi mövqeyinin bölgədə fəlakətə səbəb ola biləcəyini söyləyib. Çavuşoğlu Yəməndəki hadisələrlə əlaqədar ölkəsinin vasitəçi rolu oynayacağını, eləcə də İranın həmin ölkəyə qarşı məzhəb baxımından yanaşdığını deyib. “İraq, Suriya və Yəməndə baş verən hadisələrə baxaraq, müəyyən dərslər çıxara bilərik. Əgər hərə öz pəncərəsindən bu məsələyə baxarsa, bu halda heç bir probelmin həllindən söz gedə bilməz. Tezliklə problemlərin həlli axtarılmalı, Yəmənin bütövlüyü çərçivəsində addımlar atmalıyıq”, – deyə M.Çavuşoğlu bildirib. Türkiyə xarici işlər naziri ölkəsinin bu məsələdə vasitəçi olmasının vacibliyini bir daha sözlərinə əlavə edib.

Xatırladaq ki, bu gün Türkiyə prezidenti Rəcəb Tayyib Ərdoğan İrana rəsmi səfərə gedəcək. Ərdoğanın iranlı həmkarı Həsən Ruhani ilə yanaşı Ali dini lider Ayətullah Əli Xamneyi ilə görüşü də nəzərdə tutulub.

Ölkə.Az