BBC müxbirinin Qarabağa qanunsuz səfəri ilə bağlı

“BBC kanalının müxbiri Rayhan Demytrinin Azərbaycanın işğal olunmuş ərazilərinə səfəri barədə Azərbaycan tərəfinin əvvəlcədən məlumatı var idi. “BBC World News” xidmətinin rəhbərliyi bu səfərlə əlaqədar Azərbaycana məktub ünvanlamışdı”. 

Bunu Rayhan Demytrinin Azərbaycanın işğal olunmuş ərazilərinə səfərini şərh edən Xarici İşlər Nazirliyinin mətbuat xidmətinin rəhbəri Hikmət Hacıyev deyib.

Hikmət Hacıyev bildirib ki, məktubda beynəlxalq media qurumu kimi BBC-nin Azərbaycan Respublikasının suverenliyi, ərazi bütövlüyü və beynəlxalq səviyyədə tanınmış sərhədlərinə və Azərbaycanın işğal edilmiş ərazilərinə səfərlərə icazə verən qanun və qaydalarına hörmət etdiyi vurğulanıb. Bu əsnada məktubda müxbir Rayhan Demytrinin reportaj hazırlamaq üçün Azərbaycan Respublikasının Dağlıq Qarabağ regionuna səfər etməsi üçün icazə istənilib.

“Verilişdə səsləndirilən bəzi məqamları qəbul etməsək də, jurnalist fəaliyyətinin ölkənin qanunlarına hörmət əsasında peşəkar səviyyədə həyata keçirilməsinə və mətbuatın azadlığına hörmətlə yanaşırıq”, - deyə mətbuat xidmətinin rəhbəri diqqət çatdırıb.

H.Hacıyev deyib: “Təəssüflər olsun ki, Ermənistan tərəfindən Azərbaycanın işğal olunmuş ərazilərində yaradılmış qondarma rejim reportajın ətraflı şəkildə hazırlanmasına imkan verməyib. Bir qayda olaraq, Azərbaycanın işğal edilmiş ərazilərinə səfər edən əcnəbi KİV nümayəndələrinə ciddi nəzarət altında çox məhdud marşrut üzrə hərəkət etməyə və çəkiliş aparmağa imkan verilir.

Əgər jurnalistə çəkiliş üçün imkan verilsəydi, o, işğal olunmuş ərazilərdə etnik təmizləməyə məruz qalmış Azərbaycan vətəndaşlarının mülkiyyətinə və Azərbaycan xalqına məxsus tarixi maddi-mədəniyyət və dini abidələrə qarşı törədilmiş vəhşilikləri təqdim edə bilərdi.

Habelə, adi insanlarla sərbəst təmasa imkan verilsəydi, BBC-nin jurnalisti Ermənistanın təcavüzü nəticəsində Azərbaycanın işğal edilmiş ərazilərində vəziyyətin dözülməz həddə acınacaqlı olduğunu görərdi”. 

Ölkə.Az