Nazir: TASİM də TANAP qədər vacibdir
Frankfurtdan Honkonqa qədər beynəlxalq fiber-optik marşrutun yaradılması məqsədi daşıyan Trans Avrasiya Superinformasiya magistralı (TASIM) layihəsinin yaradılması, Bakı və Ankaranın birgə həyata keçirdikləri Transanadolu qaz kəmərinin (TANAP) tikilməsi qədər miqyaslı mahiyyətə malikdir.
Bu barədə, “Marmara Group” fondu tərəfindən təşkil edilən 18-ci Avrasiya İqtisadi Forumuna başçılıq edən, İstanbulda səfərdə olan Azərbaycanın rabitə və yüksək texnologiyalar naziri Əli Abbasov Türkiyənin “Hürriyet Daily News” qəzetinə verdiyi müsahibəsində bəyan edib.
Onun sözlərinə görə, TASİM layihəsi başa çatdıqdan sonra, onu mahiyyətinə görə TANAP ilə müqayisə etmək mümkün olacaq.
TASİM layihəsi Frankfurtdan Honkonqa qədər tranzit rabitə xəttinin yaradılmasını nəzərdə tutur. Avropa və Asiyanın informasiya mübadiləsi mərkəzlərini birləşdirəcək şəbəkə, Çin, Qazaxıstan, Azərbaycan, Gürcüstan, Türkiyə və Almaniyaya qədər uzanacaq.
Azərbaycanın “Şahdəniz” yatağından qazın Gürcüstan-Türkiyə sərhəddindən Türkiyənin qərb sərhəddinə qədər nəqlini nəzərdə tutan TANAP qaz kəmərinin təməli bu yaxınlarda Qars şəhərində qoyulub.
Nazirin sözlərinə görə, Azərbaycan və Türkiyə bu gün əməkdaşlıq templərini yalnız neft-qaz sahəsində deyil, eləcə də İKT sahəsində də artırırlar.
Nazir qeyd edib ki, hər iki tərəf biznesin inkişafı üçün sahibkarların vergilərdən və gömrük rüsumlarından azad olacaqları əlverişli şəraitin yaradılmasına çalışırlar.
Abbasovun sözlərinə görə, Bakının və Ankaranın müştərək layihəsi var. Bu layihə Azərbaycan və türk sahibkarları üçün iki ölkənin bazarına çıxış imkanı yaradacaq və bu dövlətlərin şirkətləri üçün ixrac və ticarət imkanlarını genişləndirəcək.
O, həmçinin Azərbaycan və Türkiyənin regionda artan mahiyyətini də qeyd edib.
Abbasovun sözlərinə görə, Mərmərə fondu Avrasiyanın iqtisadi inkişafında əsas vacib amillərdəndir.
TASİM layihəsinin başlanması məqsədi ilə 2008-ci ildə Azərbaycan Bakı deklarasiyasını qəbul edib, sonradan bu deklarasiya BMT-nin Baş Assambleyasının 64-cü sessiyasında qəbul edilib.
TASİM layihəsi iki mərhələdən ibarətdir. Birinci mərhələ Qərb və Şərqi birləşdirmək məqsədi ilə regionun əsas ölkələri və operatorları tərəfindən tranzit və nəqliyyat infrastrukturunun tikilməsini nəzərdə tutur. İkinci mərhələdə TASİM yaradılan tranzit infrastrukturunun vasitəsi ilə dənizə birbaşa çıxışı olmayan Avrasiya ölkələrinin, o cümlədən də Orta Asiyanın, əlverişli qiymətlərlə internetə qoşulmasını təmin edəcək.
Ölkə.Az
