Pakistan Yəməndəki hərbi əməliyyatlardan imtina etdi

Pakistan həm İran, həm Səudiyyə Ərəbistanına rədd cavabı verib.

Ölkə.Az "Əl-Həyat" qəzetinə istinadla xəbər verir ki, Pakistan hökuməti İranın Səudiyyə Ərəbistanının Yəməndə müharibənin aparılması üçün yaratdığı koalisiyaya qarşılıq olaraq yenisinin yaradılması təklifindən imtina edib.

İran bu münaqişəyə Pakistan və Türkiyə qoşunlarını cəlb etməyi planlaşdırıb. Bundan əvvəl Pakistan Səudiyyə Ərəbistanının Yaxın Şərqdə İranın təsirinin yayılmasının və Yəməndə iranmeylli husi üsyançılarını hakimiyyətə gəlməsinin qarşısını almaq məqsədilə yaradılan koalisiyaya qoşulma təklifini də rədd edib.

Səudiyyə Ərəbistanı martın 25-də husilərin Yəməndə ölkənin cənub əyalətlərinə irəliləməsinin qarşısını almaq və BMT-nin rəsmi olaraq tanıdığı prezident Əbd Rəbbi Mənsur Hadinin yenidən hakimiyyətə gətirilməsi məqsədilə Yəmənə qarşı hava hücumlarına başlayıb. 10 ərəb dövləti və ABŞ "Qətiyyət fırtınası" adlanan bu hərbi əməliyyatı dəstəkləyib.

Husilər ötən ilin sentyabrından Yəmənin paytaxta hücum edib, Mənsur Hadi hakimiyyətini devirərək paytaxt Sənanı nəzarətə götürüb. O, ötən ay ölkənin cənubundakı Ədən şəhərinə sığınıb. Üsyançılar cəbun regionlarına irəlilədiyinə görə onun artı ölkədən çıxdığı deyilir. Mənsur Hadi BMT Təhlükəsizlik Şurası və Ərəb Dövlətləri Liqasından husiləri dayandırmaq üçün hərbi yardım istəmişdi.

Rəşid Mustafazadə

Ölkə.Az