Aparıcı Ülvira: "Azərbaycanda heç kəsin Kardaşyan kimi pornoulduz olmaq şansı yoxdur"

İllərdir televiziyada çalışmasına baxmayaraq, əksəriyyət onu "Toy olsun" layihəsindən tanıdı. Sonra bir müddət kənara çəkildi və "Evdəyik" adlı layihəylə yenidən ANS-dədir. Adətən, müsahiblərim haqda yaxşı fikir yazmağa ehtiyat edirəm ki, yanlış anlaşılar. Amma bu xanımın yetərincə mütaliəli və məlumatlı olduğundan xəbərdaram. Elə söhbətimizə də girişi də buradan verdik. Yəqin ki, söhbətin kimdən getdiyi məlumdur. Beləliklə, Ölkə.Az-ın suallarını tanınmış teleaparıcı Ülvira Qarayeva cavablandırır.

- Ülvira xanım, yetərincə mütaliəlisiniz, müxtəlif xarici dilləri öyrənməyə cəhd edirsiniz. Amma tamaşaçı sizi məhz şou xarakterli verilişdən tanıdı.

- O qədər mütaliəli insanlar var ki, mənim mütaliəmi onlarla müqayisə edəndə ağcaqanadın qanadı boyda görünür. Sadəcə olaraq, kitab oxumuşam, vəssalam. Məsələ burasındadır ki, məndən qat-qat artıq mütaliəli insanlar var. Heç onların peşəsi televiziyayla bağlı deyil. Özümü intellektual saymıram və deyiləm. Müəyyən dərəcədə məlumatlıyam. Ancaq durub məlumatlarıma uyğun veriliş hazırlasam, kim baxacaq ona? Mən reytinq verməliyəm axı.

- Deməli, tələbata işləyirsiniz...

- Bəli, tələbata işləyirəm.

- Bəs onda niyə bəzi sənətçiləri qınayırıq ki, 6-8 ritmdə oxuyur, bayağı mahnılar seçir, baş beynimizi aparırlar və sair? Onda onları da qınamayaq da.

- Mən işlədiyim yerin də istəklərini nəzərə almalıyam, amma onlar fərdi qaydada işləyirlər. "Şuşanın dağları" da eyni ritmdədir. Yəni musiqidən musiqiyə fərq var.

- Mənim müğənniləri müdafiə etmək niyyətim yoxdur. Amma bilirəm ki, elə mahnılar oxumayanda toya gedə bilmirlər.

- Razı deyiləm. İstənilən telekanal yaxşı mahnılar yayımlamaq istəyir. Amma o qədər müğənni var ki, gündəmə toy musiqisiylə gəlməyib. Məgər Röya toylara getmir?

- Hamı da Röya ola bilmir...

- Günay İbrahimlinin yaxşı repertuarı var, Rəqsanənin repertuarı xeyli dəyişib. Oğlanlardan "Şipşirin" Elçin, Zamiq Hüseynov toya da gedirlər, pul da qazanırlar.

- Bildiyimə görə xəbərlərdə işləmisiniz. Niyə xəbərlər departamentində qalmadınız?

- Bəlkə də ANS-in xəbərlər departamenində işləsəydim, elə orada da qalardım. Başqa bir telekanal idi, adını demək istəmirəm. Dəyirmi masalardan, toplantılardan nəsə çəkib, yazıb efirə verməliydin, o da mənlik deyildi. Amma ANS-də "İç xəbər"də işləmişəm.

- Sizin həm sosial şəbəkədəki statuslarınızda, həm çıxışlarınızda cəmiyyətə, xüsusən də kişilərə qarşı aqressiyanızın olduğun hiss edirəm. Bu nədən irəli gəlir?

- Məndə kişilərə qarşı aqressiya?

- Belə deyək də, cəmiyyətimizin illərlə formalaşmış qaydalarına qarşı çıxmaq...

- İkili standartlara qarşı aqressiyam var. Amma kişilərə qarşı qətiyyən aqressiv deyiləm. Əgər hardasa bu özünü büruzə veribsə, deyin, izah edim.

- Yetərincə tanınmış simasınız və şübhəsiz ki, gün ərzində əks cins nümayəndələrindən xoş sözlər eşidirsiniz, müəyyən təkliflər alırsınız. Reaksiyanız necə olur? Yoxsa, sadəcə, yola verirsiniz?

- Yola vermirəm, qıcıqlanıram və cavablandırmıram. Boş-boş insanlar boş-boş şeylər yazırlar. Nəyimə lazımdır, niyə yazırlar? Yazmasınlar.

- Məsələn, nə yazırlar?

- Elə dediyin kimi etiraflar olur.

- Evlilik təklifləri də olur?

- Bəli,amma bu, mənə görə dəxilsiz bir şeydir. Ümumiyyətlə, real həyatda tanımadığım insanı sosial şəbəkədə dostluğa qəbul etmirəm. Hətta elə etmişəm ki, artıq adamlar mənə dostluq göndərə, yaza bilməsinlər. Təbii ki, kiminsə xoşuna gəlmək yaxşıdır. Ancaq sonradan yazırlar ki, niyə yazmırsınız, özünüzü çəkirsiniz. Bax, onda adamın zəhləsini tökürlər.

- Evlilik təklifi olanda necə reaksiya verirsiniz? Ümumiyyətlə, düşünməyə dəyən təklif olur?

- Bilirəm ki, bütün xanım aparıcılara dəfələrlə elə təklif olub. Həmçinin də bəylərə. Amma onu necə dəyərləndirmək olar?

- Yəni sosial şəbəkədə tanış olduğunuz şəxslə ailə qurmaq sizlik deyil...

- Yox, yox... Qətiyyən. Elə şey olar? Gərək həmin adamı reallıqda görəsən. Kimdir onunla məşğul olan?

- Ümumiyyətlə, ailə qurmaq barədə düşünürsünüz?

- (gülür) Bu yaxınlarda ailə qurmaq barədə çox dərindən düşünmüşəm və yeni bir qənaətə gəlmişəm. Həmişə deyirdim ki, bəli, istəyirəm. Amma bir aya yaxındır ki, anam evdə yoxdur. Bu müddət ərzində dostlarımla görüşə bilmirəm, axşam qızımla bərabər evdə otururam, yeməyi özüm bişirirəm. Bu, mənim üçün xərac vergisinə bənzəyir, çox əzablıdır. Düzdür, çox dadlı yeməklər bişirirəm. Əksəriyyətinin reseptini internetdən götürürəm, yeni-yeni təamlar hazırlayıram. Amma hər gün bu işləri təkrarlamaq məcburiyyəti məni məhv edir. Düşündüm ki, ailə qursam, gərək paltar yuyam, ev yığışdıram. Sözsüz ki, bunu evimdə də edirəm, hər şey anamın üstündə deyil. Amma o məcburiyyət məni məhv edər.

- Bəs qızınızın atası üçün bunları etməmisiniz?

- Olub, amma gör o vaxtdan nə qədər vaxt keçib.

- Yəni düşüncə tərzi dəyişib...

- Mən artıq belə vərdiş etmişəm. Heç bir məcburiyyətim yoxdur. Özüm istəməsəm, heç nə etmərəm. Amma evdə kişi olsa, hökmən ona qulluq etməlisən, başına dolanmalısan. Bu, məni öldürər.

- Müsahibələrinizdən birində demişdiniz ki, qadının namusu onun cinsiyyət orqanında deyil. Soruşmaq istərdim ki, bəs sizə görə qadının namusu nədədir?

- Bu yaxınlarda Kim Kardaşyan İrəvana gəlmişdi. Sən özün də mənim statusuma yazmışdın ki, Kardaşyan Ermənistan üçün Serj Sarkisyanın etdiklərindən daha artığını edib. Bu fikirdə səninlə tamamilə razıyam. Ermənistanın adı heç bir dəftərdə olmadığı halda, Kardaşyanın izləyiciləri baxırlar ki, o indi hara gedib? Ermənistana. Sonra görlər ki, bunlara qarşı soyqırım həyata keçirilib. Halbuki bunların uydurma olduğunu hamımız bilirik. Serj Sarkisyan əlinə çubuq alıb bütün dünyanı gəzib xəritədə göstərsəydi, bu qədər effektli olmayacaqdı. Bütün dünya mətbuatı da bu haqda yazır, fanatları izləyir. Çünki o, dünya səviyyəli ulduzdur. Ermənistan onun tarixi vətənidir. Kardaşyan heç Ermənistanın üzünü görməmişdi. Əgər o qadın vətəni üçün nəsə edə bilirsə, haladı ona. Birbaşa sualına gəlincə, doğrudan da belə düşünürəm ki, qadının namusu onun cinsiyyət orqanı deyil. Qarabağ döyüşlərində kişilər deyirdilər ki, arvad-uşağı çıxardıram buradan. Amma ən birinci vətənin namusudur. Elə şeylər də var ki, sırf insani dəyərlərlə bağlıdır. Desəm, məni topa tutacaqlar.

- Təqdir edirsiniz ki, pornoulduz olsa belə, vətəni üçün işlər görür. Siz dünya səviyyəsində pornoulduz olub, ölkəniz üçün belə işlər görməyə razı olardınız?

- Birincisi, Kim Kardaşyan pornoulduz deyil. Onun pornofilmlərini kim görüb?

- Belə təqdim olunur.

- Onu yalnız bizimkilər elə təqdim edirlər.

- Xeyr, Rusiya, Türkiyə mətbuatı da belə təqdim edir.

- Onda bir porno filmini təqdim etsinlər, baxaq. Bəlkə də var, gözümdən yayınıb. O ki qaldı mənim pornoulduz olmağıma, bu, mümkün deyil. Çünki klassik azərbaycanlı tərbiyəsi almışam. O isə Amerikada böyüyüb. Azərbaycanda heç kəsin Kardaşyan kimi pornoulduz olmaq şansı yoxdur.

- Əgər düşünürsünüzsə ki, qadının cinsiyyət orqanı onun namusu deyil, pornoulduz olmağın nəyi qəbahətdir? Razısınız?

- Mən Azərbaycan şəraitini nəzərdə tuturam. Pornoulduz başqa bir şeydir. Məsələn, Saşa Qrey pornoulduzdur, Eminemin kliplərində çəkilir. O, pornoyla yalnız öz peşəsi çərçivəsində məşğul olur, kənarda isə normal bir insandır. O ki qaldı qadının namusuna, Azərbaycanda qadını o namusla şantaj edirlər və mən buna qarşı çıxıram. Məsələn, səni döyən, incidən həyat yoldaşından qaçıb, dövlət orqanından kömək istəyirsənsə, artıq sən əxlaqsız sayılırsan.

- Elgizlə münasibətləriniz necədir? Bildiyimə görə aranız soyuqdur.

- Elgizlə münasibətimiz əladır. Heç vaxt da pis olmayıb. Mən Elgizə mənəm-mənəm deyən bir çox insanlardan daha çox hörmət edirəm. Çünki o, çox dürüst adamdır.

- Ara-sıra görüşürsünüz?

- Yox, görüşmürük. Onsuz da bir yerdə işləyəndə də vaxtımızı bir yerdə keçirmirdik. Amma ona böyük hörmətim var. Səbəbi isə dediyim kimi, kefiyyətli insan olmasıdır.

- Bildiyimə görə teleməkanda "Toy olsun"dan yüksək reytinqli veriliş olmayıb.

-Bəli, 32 reytinq olmuşdu və bu göstərici heç kimdə olmayıb.

- Yenidən belə bir layihə olsa, üzərinizə götürərsiniz?

- Azərbaycanda bir də o tip layihə olmayacaq.

- Ümumiyyətlə, bu tip layihələrdə qurulan ailələr nə dərəcədə uğurlu olur?

- Biz özümüz iki il ərzində 20 toy elədik. Yəni, ayda bir toy edirdik. Bizim etdiyimiz toylardan dörd ailə ayrılıb ki, onlar da çox tələsmişdilər. Ümumilikdə isə "Toy olsun" vasitəsilə 50-60 ailə quruldu. O ki qaldı ailələrin dağılmağına, ata-ananın araşdırıb qızını verdiyi oğlan da pis çıxa bilir, elə ailələr də dağılır. Amma orada iştirakçılar müqəddəratlarıını özləri həll edirdilər.

- Qızınızın şəxsi həyatına, xaricdə təhsil almasına müdaxilə etməyi düşünürsünüz?

- Aprelin 1-də qızımın 16 yaşı tamam oldu. Dördüncü ixtisas qrupunu seçib və həkim olmağı düşünür. Arada ona dedim ki, bəlkə tərcüməçi olasan, çünki ingilis dilində səlis danışırsan. Dedi ki, ingilis dilini bilən həkim olmaq daha yaxşıdır. Xaricdə oxumaq istəyir. Qızımın həyatında yaratmaq istədiyi bütün gözəlliklərə yardımçıyam. Təbii ki, seçim özünündür.

- Bəs tez ailə qurmaq istəsə?

- İyirmi üç yaşdan etibarən qızın ailə qurmaq vaxtıdır. O da istəməz tez ailə qursun. Amma yenə də qismət. Elə bir qismət çıxa bilər ki, nə mən vaz keçə bilərəm, nə də o. Bu, könül işləridir.

- Həftədə beş dəfə eyni verilişi aparmaq sizi yormur ki?

- Bütün gündəlik verilişlərdə sadəcə, qəhrəmanlar dəyişir. Həkimlər, ictimai xadimlər, şou biznes əhli gəlir və düşünmürəm ki, burada təkrarçılıq var. Biz verilişi hazırlayanda bilirik reytinq necə olacaq.

- Hazırda "Evdəyik"in reytinqi neçədir?

- Təxminən 7-8 olur. Sonuncu verilişimiz 9-dan artıq reytinq vermişdi..

- Olubmu ki antipatiyanız olan bir qonağınızla gedişatda dost olasınız?

- İnsanı tanımadam antipatiyam olmur. Bütün qonaqlarımı gülər üzlə qarşılamışam və sevgiylə yanaşmışam.

- Aparıcıların çoxu deyir ki, şou-biznes adamlarıyla dostluq etməyə dəyməz.

- Mən də eləyəm. Şou-biznesdən iki-üç dostum var ki, onlarla vaxtaşırı ünsiyyət saxlayırıq.

- Deyəsən biri Almaz Ələsgərovadır...

- Sadəcə, Almaz Ələsgərovanı çox istəyirəm. İfrat neqativ münasibət bəslədiyim kimsə yoxdur.

- Sizə görə jurnalistikada karyeranızın piki irəlidədirmi, yoxsa elə o pik mərhələ "Toy olsun" idi?

- "Toy olsun"dan sonra reytinq və populyarlıq baxımından heç bir layihəni pik kimi düşünə bilmirəm. "Toy olsun" mənim tanınmağım üçün ideal var idi. Elə aparıcılar ki, illərdi efirdədirlər və onların bəxtinə belə bir layihə düşməyib.

- Və yeri gəlmişkən, özünüz də orada ailə qurdunuz...

- O bir səhv idi. Ona görə deyirəm ki, insaınn həyatını bilmədən qınamamalısan.

- İndi həmin insanla ünsiyyətiniz var?

-O səhifəni həyatımdan silmişəm. Bu barədə də danışmaq istəmirəm. Heç bilmirəm ölüb, yoxsa qalıb.

İntiqam VALEHOĞLU

Ölkə.Az