AFFA-dan Böyükağa Hacıyevin fikrinə reaksiya: "Araşdırılacaq"

AFFA "Neftçi"nin sabiq baş məşqçisi Böyükağa Hacıyevin oyun satılmasıyla bağlı məlum açıqlamasına reaksiya verib.

Qurumun informasiya və ictimaiyyətlə əlaqələr departamentinin rəhbəri Mikayıl Nərimanoğlu Ölkə.Az-a açıqlamasında bildirib ki, əgər həmin oyunla bağlı şübhəli məqamlar varsa araşdırılacaq:

"Mən hazırda stadiondayam və dediyiniz məsələdən xəbərsizəm. Əgər doğrudan da şübhələnməyə əsas varsa, müvafiq komissiya tərəfindən araşdırmalara başlanılacaq".
Maraqlıdır ki, təcrübəli mütəxəssisin şəxsən etiraf etdiyi məsələdə hansısa şübhəli məqam axtarmağın adı nədir?

Xatırladaq ki, Böyükağa Hacıyev "Qol" verilişində uzun müddət baş məşqçisi olduğu "Neftçi"nin çempionatın ilk turunda "Araz Naxçıvan"a qəsdən uduzduğunu söyləyib. Mütəxəssis bunu vaxtilə Naxçıvan təmsilçisinin heyətində forma geyinməsi ilə əlaqələndirib:

"On beş il "Araz Naxçıvan"da oynamışam. Ona görə də Naxçıvana ikinci heyəti göndərdim. Futbolçular da bilirdilər ki, o, mənim komandamdır, qalib gəlmək olmaz".

İntiqam VALEHOĞLU
Ölkə.Az