Dəmiryolu tarifləri ucuzlaşdı

2015-ci ilin mart ayında nəqliyyat sektorunda yükdaşıma tarifləri 11,2%, sərnişindaşıma tarifləri isə 0,8% bahalaşıb.

Bu barədə Ölkə.Az-a Dövlət Statistika Komitəsindən məlumat verilib.

Komitənin məlumatına görə, hava nəqliyyatında sərnişindaşıma tariflərində MDB ölkələri üzrə 0,9%, digər xarici ölkələr üzrə 6,9% bahalaşma müşahidə olunub. Yükdaşıma tarifləri üzrə isə heç bir dəyişiklik müşahidə olunmayıb.

“Ay ərzində dəmiryolu nəqliyyatında MDB ölkələri üzrə sərnişindaşıma tarifləri 4,2% ucuzlaşıb, yükdaşıma tarifləri isə sabit qalıb.

Dəniz nəqliyyatında yükdaşıma tarifləri MDB və digər xarici ölkələr üzrə müvafiq olaraq 30,2 və 32,2% bahalaşıb, sərnişindaşıma tarifləri isə sabit qalıb.

Mart ayında boru kəməri vasitəsilə neftin və qazın nəql olunma tarifləri müvafiq olaraq 17,7 və 21,8% bahalaşıb. Avtomobil nəqliyyatında yükdaşıma tarifləri üzrə 0,1% bahalaşma qeydə alınıb, sərnişindaşıma tarifləri üzrə isə heç bir dəyişiklik müşahidə olunmayıb” - deyə DSK-nın məlumatında deyilir.

Ölkə.Az