Sevinc qəsəbəsini kədərə bürüyən bərbad yollar

Ayrılan vəsait mənimsənilib?

Ölkə.Az-a daxil olan şikayətə görə, Azərbaycan Respublikasının Gəncə şəhərinin 5 minfən çox əhalisi olan Sevinc qəsəbəsinin yolları keçilməz vəziyyətdədir.

Bildirilir ki, qəsəbə yollarının durumu o hala çatıb ki, lazım olan yerə vaxtında çatmaq qeyri-mümkündür.

Bu yaşayış yeri qəsəbə kimi mövcud olsa da, onun kələ-kötür, bərbad yollarına əncam çəkilməsinə hələ də başlanılmayıb.

Adıçəkilən qəsəbənin bir neçə küçəsində yağışlı və qarlı günlərdə avtomobillərin, eləcə də piyadaların hərəkəti məhdudlaşıb və illərdir bərbad yola görə əziyyət çəkən Sevinc qəsəbəsinin sakinlərinin bu probleminə son qoyulmur.

Oxucularımızdan biri iddia edir ki, qəsəbənin keçilməz yollarının bərpası üçün külli miqdarda maliyyə ayrılsa da, bəzi yerli məmurların məsuliyyətsizliyi üzündən heç bir quruculuq həyata keçirilmir.

Qeyd edək ki, ötən illərdə Gəncə Şəhər İcra Hakimiyyəti 5 minədək əhalisi olan Sevinc qəsəbəsində sakinlərlə bir neçə dəfə görüş keçirmiş və həmin görüşdə Gəncə Şəhər İcra Hakimiyyətinin başçısı Elmar Vəliyev Sevinc qəsəbəsində yaranmış bəzi problemlərin tezliklə həll ediləcəyini diqqətə çatdırmışdı.

Daha çox qəsəbənin yollarından, infrastrukturundan şikayət edən sakinlərlə görüşün sonunda qaldırılan məsələlərin həllini tapması üçün aidiyyəti qurumların rəhbərlərinə tapşırıqlar verilmişdi.

Məsələ ilə bağlı aidiyyatı orqanların mövqeyini yayımlamağa hazırıq.

Rəşid Mustafazadə

Ölkə.Az