"Boko Haram" 2 min qadını qaçırıb

Bugünkü hesabatın məlumatı.

Ölkə.Az xəbər verir ki, Beynəlxalq Əfv Təşkilatının (Amnesty İnternational) hesabatına əsasən, "Boko-Haram" terror qruplaşması ötən ilin əvvəlindən etibarən 2000-dən çox qadın və qızları qaçırıb.

Bildirilir ki, qaçırılan şəxslər əsir alınaraq aşpaz, döyüşçü qismində və cinsi istismar üçün istifadə edilib. İtaət etməyən qadın və qızlar isə qətlə yetirilib. Beynəlxalq Əfv Təşkilatı (Amnesty İnternational) 90 səhifəlik hesabatı hazırlamaq üçün "Boko-Haram" əsirliyindən qaçan onlarla şahiddən müsahibə alıb.

Bir il öncə terrorçu qruplaşma Nigeriyanın şimalında Borno ştatının Çibok kəndinə basqın edərək 200-dən çox məktəbli qızı oğurlamışdı. Sonradan yayımlanan videogörüntüdə məktəbli qızlar nümayiş olunmuşdu. Bu hadisəyə beynəlxalq ictimaiyyət tərəfindən tənqidlər səsləndirilsə də, qızların xilas edilməsi uğrunda heç bir konkret addım atılmayıb.

Bir müddət əvvəl isə "Boko-Haram" terrorçu qruplaşmanın lideri Əbu Bəkr Şekau məktəbli qızların hamısının silahlı dəstə üzvlərinə ərə getdiyini açıqlamışdı.

Boko Haram ( Camaat’u Əhlus-Sünnə lid-Da’va vəl Cihad) Nigeriyanın radikal islam sektasıdır. O, 2002-ci ildə Nigeriyanın şimalında Məhəmməd Yusif adlə şəxs tərəfindən yaradılıb. Təşkilatın əsas məqsədi bütün Nigeriya ərazisində şəriətin tətbiqi və Qərb həyat tərzinin silinməsidir. 2014-cü ilin may ayında BMT Təhlükəsizlik Şurası tərəfindən terror təşkilatları siyahısına salınıb.

Rəşid Mustafazadə

Ölkə.Az