Deputat: “Konqresin Azərbaycanla bağlı qətnamə layihəsi ABŞ-ın milli maraqlarına ziddir”
Bunu “Ölkə.Az”a açıqlamasında millət vəkili Məşhur Məmmədov deyib.
Onun sözlərinə görə, belə bir sənədin qəbulu ümumiyyətlə ABŞ-ın bölgədəki milli maraqlarına zərbə deməkdir. “Çünki bu gün bölgədə ABŞ Ermənistandan fərqli olaraq Azərbaycanla iqtisadi, enerji və təhlükəsizlik sahəsində sıx əməkdaşlıq edir”- millət vəkili qeyd edib.
Deputat onu da əlavə edib ki, 1992-ci ildə hadisələrin ilk illərində işğalçıqlıq siyasətini Ermənistan həyata keçirsə də ABŞ Azərbaycana təzyiq məqsədi ilə 907-ci düzəliş qəbul edib. “ABŞ erməni lobbisi və onları dəstəkləyən dairələrin təsiri altında analoji addımı ataraq yenidən Azərbaycana qarşı 1165 saylı qətnamə layihəsini Konqresdə müzakirəyə çıxarıb qəbul etməyə çalışır. Bu yol verilməz haldır. Çünki işğalçılıq siyasətini həyata keçirən Ermənistandır. Belə təzyiq xarakterli qətnamələr Azərbaycana qarşı deyil təcavüzkar Ermənistanın işğalçılıq siyasətindən əl çəkilməsi üçün qəbul edilməlidir. Belə bir sənədin Konqresdə müzakirəyə çıxarılması ümumiyyətlə ABŞ-ın ATƏT-in Minsk qrupu həmsədr ökkəsi kimi həm obyektivliyinə, həm də nüfuzunə ciddi zərbədir”- deputat qeyd edib.
Deputat onu da əlavə edib ki, erməni lobbisinin təşəbbüsü ilə Konqresdə Nümayəndələr Palatasının müzakirəsinə çıxarmağı planlaşdırdığı 1165 saylı qətnamənin müəllifləri erməni qrupunun həmsədrləri Jackie Speier və Frank Pallonedir: “Bu şəxslər uzun illərdir ki, ABŞ-da hakimiyyət dairələrində Ermənistanın maraqlarını qoruyurlar. Onların hər ikisi həm də erməni soyqırımı ilə bağlı aktın sponsorlarıdır. Bildiyimiz kimi, ABŞ-da seçkilər dövrü yaxınlaşır. Belə bir məqamda qətnamə müəllifləri erməni seçicilərin səslərini qazanmaq üçün fəallıq göstərirlər”.
Millət vəkili ABŞ-da və xarici ölkələrdə yaşayan soydaşlarımıza səslənərək sözügedən qətnamənin qəbulunun dayandırılması üçün bütün imkanlardan istifadə etməyə çağırıb. “Bunun üçün soydaşlarımız yaşadıqları ərazidə yerli ştat və federal səviyyələrdə onları təmsil edən Nümayəndələr Palatasının üzvlərinə hazırkı durumla bağlı məlumatlar çatdırmalı, onlara məktublar ünvanlamalı, onlarla müxtəlif vasitələrlə əlaqə yaradıb 1165 saylı qətnamənin qəbulunun dayandırılmasına çalışmalıdırlar. Soydaşlarımız həmçinin “Twitter” sosial şəbəkəsində də fəallıq nümayiş etdirməlidirlər. Bu gün ermənilərin bizə qarşı mübarizə apardığı hər bir sahə cəbhə xəttidir və biz bütün sahələrdə düşmənə zərbələr vurmalıyıq” – millət vəkili bildirib.
Mürtəza
Ölkə.Az