Azərbaycanlılar daha çox yaşamağa başlayıblar

Azərbaycanda ömür uzunluğu 4,6 il artaraq 74,2 yaşa çatıb.

Ölkə.Az xəbər verir ki, bu sözləri ƏƏSMN naziri Səlim Müslümov Dünya Bankının Azərbaycanda demoqrafik vəziyyətlə əlaqədar aparılmış araşdırmanın nəticələrini təqdim edərkən bildirib.

Nazirin sözlərinə görə, 1994-cü ildən sonra ötən dövrdə Azərbaycan əhalisinin sayı sabit qaydada artaraq cari il martın əvvəlinə 9,6 milyonu ötüb.

Əhalinin illik artım tempinin 1,3 faiz təşkil etdiyi Azərbaycan bu göstərici ilə Avropada ilk yeri tutur. Respublikada həmçinin körpə və uşaq ölümü halları müvafiq olaraq 2,3 dəfə və 3,5 dəfə azalıb.

Təkcə cari ilin yanvar-fevral ayları ərzində doğulanların sayı ölənlərin sayından 18,5 min nəfər çox olub.

Cari ilin ilk iki ayı ərzində ölkədə 27,9 min, yaxud hər gün orta hesabla 473 körpə doğulub və əhalinin hər 1000 nəfərinə hesabı ilə bu göstərici 18,2 təşkil edib.

Ölkə.Az