Vitse-spiker: “Qəsbkar Ermənistan döyüş və diplomatiya meydanında olduğu kimi informasiya müharibəsində də uduzub” .
Bunu “Ölkə.Az”a açıqlamasında Milli Məclisin Sədr müavini Fəzail İbrahimli deyib.
Milli Məclisin Sədr müavini bildirib ki, Azərbaycan uğurlu əməliyyatlara başladığı ilk günlərdən başlayaraq bir neçə cəbhədə mübarizə aparmaqdadır: “ Birincisi, atəş xəttində erməni və muzdlularla, ikincisi, diplomatik müstəvidə... Çünki Azərbaycan ordusunun başlatdığı ilk uğurlu əməliyyatlardan dərhal sonra dünyadakı ermənipərəst qüvvələr Azərbaycanın üzərinə yeridi. Dünyanın ən böyük Fransa, Almaniya və digər ölkə rəhbərləri Azərbaycan Prezidentinə zəng edərək atəşkəs rejimini qoruyub saxlamağa çağırdılar.
Azərbaycan ordusunun uğurlu əməliyyatları həyata keçirdiyi bir zamanda Paşinyan xarici jurnalistlərdən birinə müsahibəsində Azərbaycanla danışıqlara hazır olduğunu bəyan etdi. Paşinyanın bütün vasitələrədn istifadə edərək Moskvaya dəfələrlə müraciətindən sonra Kreml atəşkəslə bağlı mövqeyini ortaya qoydu. Azərbaycan tərəfi də bu çağırışa müsbət cavab verərək humanitar atəşkəsə meyid və əsirlərin dəyişdirilməsinə laqeyd olmadığını və müharibə şəraitinin olmasına baxamayaraq bir daha humanist dövlət olduğunu dünyaya nümayiş etdirdi.
Sual oluna bilər ki, uğurlu hərbi əməliyyatlar həyata keçirib üstünlüklərin Azərbaycanın tərəfində olduğu halda niyə atəşkəsə razı oldu? Axı, qalibsən, hansı qüvvə səni danışığa vadar edir? Təbii ki, Azərbaycan cəmiyyətində də bu sual yarandı və bu sualı verənlərin də haqqı var idi.
Azərbaycan bu danışıqlara diplomatiya müstəvisindəki tələyə düşməmək üçün getdi. Əslində qalib şəraitdə olmasına baxmayaraq Azərbaycan bu addımı ilə bir daha sülh danışıqlarında sadiq olduğunu ortaya qoyub, dünyaya sülhsevərliyini nümayiş etdirdi. Bununla da başqalarına bəhanə vermədi. Burada həm də bir humanizm prinsipləri var idi. Yəni Azərbaycan qarşı tərəfi sülhə dəvət edib, münaqişəni danışıqlar yolu ilə həllinə nail olmaq istəyini qoyaraq, ona imkan yaratdı. Amma təcavüzkar Ermənistan ona verilən şansı dəyərləndirə bilmədi”.
Paşinyanın imzalanan atəşkəsə əməl etməməsinin səbəblərini açıqlayan vitse-spiker bildirib ki, Paşinyan əslində atəşkəs istəmirdi: “Təcavüzkar Ermənistan hakimiyyəti bu hiyləgər taktikadan istifadə edib Bakı ilə Moskvanı qarşı-qarşıya qoymaq niyyətini güdürdü. Hesab edirdi ki, cəbhədə uğurlara imza atan, 30 il torpaqların işğaldan azad edilməsi həsrəti ilə yaşayan və qələbənin ovcunun içində olduğu bir zamanda Azərbaycan danışığa getməyəcək. Bu yolla Azərbaycanı tələyə istəyirdi. Ancaq niyyəti baş tutmadı. Cənab Prezident seçdiyi taktika ilə əslində Paşinyanın özünü tələyə salmış oldu.
Ona görə ki, humanitar atəşkəs əslində Paşinyana sərf etmirdi və etmir də... Paşinyan yaxşı bilir ki, atəşkəs olarsa işğaldan azad olunan ərazilərdən daşınacaq meyidlər onun özünü meyidə çevirəcək. Ona görə də sülh istəmədi və oyundan qaçdı. Atəşkəs rejiminə bir neçə saat əməl etmədi. Gəncəni raket atəşinə tutdu. Bu mənə 19943-cü ilin Alman faşistlərinin Londonu bombalamasını xatrılatdı. Onlar Alman faşisti idisə, bunlar da erməni faşisti. Çünki genlərində faşizm var. Bunu özləri öz fəaliyyətləri ilə etiraf edirlər. Gəncəni bombalamağın iki məqsədi var idi. Birincisi, qisas almaq, ikincisi, mülki əhalini hədəf seçməklə Azərbaycan cəmiyyətində təşviş, ruh düşkünlüyü yaratmaq idi. Amma erməni faşistləri bu mıəsələdə də yanıldılar. Erməni faşistləri Gəncənin hələ də Azərbaycan qeyrət beşiyi olduğunu unudurlar. Gəncənin tarixən düşmənə, elə zamanında daşnak ermənilərinə qarşı necə vuruşduğunu unudurlar. Bu yolla Gəncə camaatını iradəsini qırmaq mümkün deyil.Odur ki, Paşinyan bu oyunda da uduzdu və iflasa uğradı. Xalq Prezidentin ətrafında daha sıx birləşərək Vətən müharibəsini davam etdirməyə hazır olduqlarını bəyan etdi”.
Azərbaycanın döyüş meydanında olduğu kimi informasiya müharibəsində də qalib gəldiyini qeyd edən millət vəkili bildirib ki, cənab Prezident müharibə başlandığı gündən dünyanın ən müxtəlif aparıcı media qurumlarına verdiyi müsahibələri ilə böyük bir ordunun işini görüb. “Cənab Prezident kifayət qədər yığcam, ədalətli, obyektiv, siyasi cəhətdən tutarlı mövqeləri ilə informasiya müharibəsində erməni tərəfinin yalanlarını darmadağın etdi. Bununla da döyüş, diplomatiya meydanında olduğu kimi Paşinyan informasiya cəbhəsində də uğursuzluğa düçar oldu”.
Vitse-spiker onu da əlavə edib ki, Paşinyan son hərəkətləri ilə Moskvanı pis vəziyyətdə qoymuş oldu: “Çünki humanitar atəşkəsin əldə edilməsini Moskvadan xahiş edən Paşinyan olub. Əldə edilən razılığı ilk pozub, əməl etməyən də Paşinyan oldu.
Təcavüzkar Ermənistandan fərqli olaraq Azərbaycan torpaqlarını işğaldan azad etmək uğrunda mübarizə aparır. Bu haqq mübarizəsində Allah bizə yar olsun! Cənab Prezidentin rəhbərliyi altında həyata keçirilən xilaskarlıq missiyası tezliklə uğurla başa çatsın və Qarabağda Azərbaycan bayrağı dalğalansın!”.
Mürtəza
Ölkə.Az
