21 yaşlı oğul anası olan aparıcı: “Həyatımda heç kim yoxdur, olsa sevinərdim”
Onu çoxlarınız tanıyırsınız. Təbii ki, mən də sizin kimi. Amma bu müsahibəyə qədər ağlıma da gəlməzdi ki, o, bir zamanlar “Neftçi”nin formasını geyinmiş məşhur futbolçumuzun qızıdır, 21 yaşlı oğul anasıdır. Ancaq söhbətimizin gedişatında bundan da maraqlı nüanslar ortaya çıxdı. Beləliklə, Ölkə.Az “Lider” televiziyasında yayımlanan “Səhər çağı” verilişinin aparıcısı Nuranə Axundova ilə müsahibəni təqdim edir.
- Nuranə xanım, çoxları sizi efirdən tanıyır, amma haqqınızda elə də məlumatlı deyillər...
- Bakıda iki nömrəli humanitar liseyi bitirmişəm. 1990-95-ci illərdə Mədəniyət və İncəsənət Universitetinin televiziya rejissorluğu fakültəsində təhsil almışam. Bu fakültənin ilk məzunları da bizik. Mənimlə eyni vaxtda kinorejissorluq fakültəsində Aqil M.Quliyev, tanınmış operator Kənan Məmmədovun oğlu Kamran Məmmədov, Şəfiqə Məmmədovanın oğlu Ülvi, əməkdar artist Elxan Qasımovun oğlu, mərhum Samir Qasımov, rəhmətlik Tariyel Vəliyevin hazırda ATV-də rejissor işləyən oğlu Vüqar Vəliyev də təhsil alıblar. Kafedra müdirimiz Tofiq İsmayılov idi. O, məni “Yay günlərinin xəzan yarpağı” adlı filminə də çəkmişdi.
-Tələbə olanda?
- Xeyr, 6-cı sinifdə oxuyurdum. Film Lahıcda çəkilirdi. Səyavuş Aslan orada məktəb direktorunu oynayırdı. Çəkilişlərə görə bir ay Lahıcda qaldıq. Yəni mənim bu sahəyə gəlməyim oradan başlayır və ilk dəfə həmin çəkilişlər məndə böyük maraq doğurmuşdu.Həm də Tariyel Vəliyev, Ramiz Həsənoğlu kimi mütəxəssislərdən dərs almışdıq. Fakültə yeni açıldığına görə ən yaxşı televiziya mütəxəssislərini cəlb etmişdilər.
-Televiziya rejissoru kimi işləmisiniz?
- Bəli, AZTV və İTV-də həm aparıcı, həm də rejissor kimi məvacib almışam. Bütün verilişlərimin həm ssenari müəllifi, həm rejissoru, həm də aparıcısı olmuşam.
-Bəs”Səhər çağı”nda?
- Veriliş canlı olduğuna görə burada rejissorluq edə bilmərəm.
-Bəs televiziyaya gəlişiniz necə olub?
- 1992-ci ildə AZTV-də işə qəbul üçün müsabiqə elan olundu. Şərtlərə görə cəmi doqquz nəfər işə qəbul edilməliydi. İndiki Milli Məclisin (O vaxt Ali Sovet adlanırdı - İ.V.) qarşısında bəlkə minə yaxın adam vardı. Əksəriyyəti də digər ixtisaslardan olan tələbələr idi. Deyirdim ki, bunlar niyə bura gəliblər? Axı televiziyada biz işləməliyik. On səkkiz yaşımda televiziyada işə başladım və 24 ildir ki, bu sahədəyəm. 1999-cu ildə isə Bakı Dövlət Universitetinin jurnalistika fakültəsinə daxil olub, 2003-cü ildə bitirdim.
- “Səhər çağı”na necə gəldiniz?
- Tam təsadüfən “Favorit” prodakşnın rəhbəri İlham Məhərrəmovla tanış oldum. Danışdıq, razılaşdıq.
- İTV-yə gəlişiniz necə oldu?
- O vaxt Mən AZTV-də işləyirdim, İsmayıl Ömərov İTV-yə rəhbər təyin olundu və bir neçə nəfəri də özüylə apardı. İTV-nin açılışında Azərbaycan haqqında 15 dəqiqəlik filmi mən yığmışdım. Özü də həmin kadrları AZTV-dən gətirmişdim.
- Deməli, sizi İsmayıl Ömərovun kadrı da hesab etmək olar.
- Yox, İsmayıl Ömərov İTV-nin rəhbəri olanda mən Arif Alışanovun təklifiylə yenidən AZTV-yə qayıtdım.
-Niyə?
- Ondan əvvəl dövlət televiziyasında “Premyera” verilişini aparırdım. Bu dəfə isə yüksək qonorarla dəvət olunmuşdum. Getdim, müəllif layihəm olan “Ustadım”ı apardım.
- “Səhər çağı”nı neçə ildir aparırsınız?
- Üç ildir.
- Reytinqiniz necədir?
- Heç maraqlanmamışam.
-24 ildir televiziyadasınız. Amma 4-5 il efirdə olan aparıcılar sizdən çox populyardılar. Bəlkə zəif aparıcısınız, bəlkə komplekslisiniz?
- Heç bir kompleksim yoxdur, özümdə utancaqlıq hiss etmirəm.
-Amma geyimləriniz həmişə standart olur.
- Yəni açıq-saçıq geyinmirəm?
- Söhbət açıq-saçıqlıqdan getmir.Bütün libaslarınız eyni tərzdədir, sadəcə, rəngləri dəyişir.
- Bu, mənim işlədiyim yerlərlə bağlı da ola bilər. Çünki həmişə sanballı verilişlər aparmışam. Məsələn “Ustadım” verilişində qonaqlara daha çox önəm vermişəm. Elə veriliş var ki,bəzilərində isə əksinə.
- Bəs “Səhər çağı”nda qonaq öndə olur, yoxsa siz?
- Onu tamaşaçı deyə bilər. Amma deyim ki, rejissor mənə bəzən irad bildirir. Deyir ki, nəfəs al, qonaq da danışsın (gülür).
- Teleməkanın ən hündür boylu xanım aparıcısısınız. Ümumiyyətlə, boy kompleksiniz var?
-Yox.
- Boyunuz nə qədərdi?
- 176. Dikdaban geyinirəm, irad bildirirlər(gülür).
-Şəxsi suallara münasibətiniz necədir?
- Buyurun.
- Ailəlisiniz?
- İki oğlum var.
- Yarızarafat bir sual verim - yoldaşınız boyca sizdən hündür idi?
- Bəli, təxminən 4-5 santimetr. O, idmançı idi, ayrılmışıq.
-Nə zaman?
- Artıq bir neçə ildir.
-Çox maraqlı məqama gəldik. Niyə üzdə olan insanların əksəriyyətinin şəxsi həyatında belə problemlər olur?
- Kişilər xoşlayırlar ki, xanım onların dediyi ilə oturub dursun. Bizim kimi xanımlar isə bunu qəbul etmirlər.
- Dediyi ilə oturub durmaq deyərkən nəyi nəzərdə tutursunuz?
- Məsələn, mən bir film yığıram, montajı da gecə edirik. Azərbaycanlı kişi bunu qəbul etmir ki, həyat yoldaşı gecə 12-də gedib, səhər 5-də gəlsin.
- Sizdə ayrılığın səbəbi bu idi?
- Belə şeylərin də önəmi olub.
- Bəs əsas səbəb?
- Əsas məsələ xarakterlərimizin fərqli olmasıydı. Amma bir-birimizi sevib evlənmişdik.
- Razısınız ki, hətta hər ikisi yaradıcı olan ailələrin də 90 faizi uğursuz alınır?
- Bəli.
- Bəs onlar niyə bir-birini başa düşmürlər?
- Onları daxili eqoları ayrı salır. Məsələn, ər arvadın ondan öndə olmasını qəbul etmir, yaxud da əksinə. Bir-birinə yaradıcı paxıllıq edirlər.
- Düşünürsünüz ki, ərlə arvad bir-birinə paxıllıq edə bilər?
- Bəli. Ər və arvad yad insanlardı, bacı-qardaş deyillər ki. Səhər ayrıldılarsa və hətta övladları varsa da, bir-birinə yaddılar.
- Keçmiş həyat yoldaşınızı son dəfə nə vaxt görmüsünüz?
- Məsələn, uşaq əsgərliyə gedirsə, şəxsiyyət vəsiqəsi almaq lazımdırsa, görüşürük, zəngləşirik. Rəsmən boşanmışıq, amma düşmən deyilik.
- Yəqin ki, dost da deyilsiniz.
- Niyə dostluq etməliyəm ki?
- Amma bir çox ölkələrdə ayrılan cütlüklər sonradan dostluq edirlər.
- Dostluq etmək kiminləsə həmfikir olmağındır. Əgər onunla həmfikir ola bilsəydim, ayrılmazdıq.
- Düşünürsünüz ki, həmfikir olduğunuz dostla ailə də qura bilərsiniz?
- Ailə qurmaq üçün ortada sevgi də olmalıdır.
- Yenidən qayıdaq aparıcısı olduğunuz “Səhər çağı”na Həftədə beş dəfə, gündə iki saat efirdə olmaq sizi yormur?
- Mənim səhər-səhər çox yaxşı əhval-ruhiyyəm olur. Ona görə də yeknəsəkliyi hiss etmirəm. Hər gün səhər elə bilirəm ki, ilk dəfə efirə çıxıram. Bəzən qonaqlar yuxulu olurlar, ilk reklamdan sonra hamı ayılır.
- Ürəyinizcə olmayan qonaqla necə ünsiyyət qurursunuz?
- Heç vaxt yola vermirəm və elə bilirəm ki, evimə gəlib. Belə hallar çox olub.
- Sizcə, tamaşaçı niyə digər səhər verilişlərinə yox, məhz “Səhər çağı”na baxmalıdır?
- Seçim tamaşaçınındır və deyə bilmərəm ki, hər kəs mütləq bizə baxmalıdır. Verilişin qonağı, mövzusu maraqlı olanda baxılır. Biz komanda olaraq buna çalışırıq. Gündəlik efirin ağırlığı çoxdur. Bəzən bölgələrdən sənətçi dəvət edirik ki, rəngarənglik olsun. Deyim ki, bölgə müğənniləri daha maraqlıdırlar. Çünki Bakıdakı sənətçilər bir gündə eyni pencəklə dörd verilişə çəkilir.
- Efirdə maraqlı hadisələr olub?
- Səhər efiri olduğuna görə qonaqlarımız gecikir. Rejissorumuz o cəhətdən arxayındır. Bilirlər ki,qonaq gəlməsə, Nuranə iki saat danışacaq (gülür). Hərdən operatorlarımız Yusif Dadaşov və Sahib Səfərov mənə deyirlər ki, sən bir-iki dənə də mahnı yazdır, qonağın əvəzinə də oxu, qarabağlı deyilsən? (gülür) Baş rejissorumuz Mahir Həmşəriylə tələbə yoldaşı sayılırıq. Bəzən qonaqlar olur ki, efirdən əvvəl çox şən olurlar, yayım başlayan kimi ciddiləşirlər. Mahir qulağıma həmin qonaqla bağlı gülməli şeylər deyir və onları yadıma salıb gülürəm. Rejissorumuz Afət Orucova da çox peşəkardı. Ümumiyyətlə, komanda şəklində çox güclüyük.
- Sizə görə ən arzuolunan qonaq kimdir?
- Maraqlı sualdır. Azər Zeynalovla söhbət etmək çox xoş olur. Çünki ziyalı insandır. Aslan Hüseynovun da çox müsbət aurası var. Ümumiyyətlə, səhər verilişini ağırlaşdırmaq olmaz. İnsanların işə getdiyi vaxtdır. Hərdən reklam arası qonağa deyirəm ki ,bir az şən olun, , millət yazıqdır.
- Siz “millət yazıqdır” deyərkən əminsiniz ki, verilişin tamaşaçıları bu qədər çoxdur?
- Bəli. Telefon zənglərindən bilirəm ki, verilişimizə baxılır.
- Niyə sosial şəbəkədə verilişə geyim təqdim edən dükanı tez-tez reklam edirsiniz? Bu xüsusi tapşırıqdı?
- Çünki həmin dükanın reklamı bizim verilişdə getmir və əvəzində geyimləri sosial şəbəkədəki profilimdə reklam edirəm. Onlar da buna razıdırlar. Gündə iki dəfə o dükana gedirəm. Verilişdən dərhal sonra aparıb geyimi qaytarıram. Uzun müddətdir onlarla işləyirəm. Məndən sonra bir neçə aparıcılar da oradan geyim götürüblər, amma sonradan “xoş gəldin” deyib yola salıblar.
- Niyə?
- Çünki geyimi səliqəsiz qaytarırlar. Səhəri günün geyimini isə toy saatı keçəndən sonra gedib götürürəm. Ona görə ki bəzən aparıcılar həmin libasalrla toya gedirlər.
-Yenidən sizdən danışaq. İkinci dəfə ailə qurmaq barədə düşünürsünüz?
- Bu haqda övladlarım kiçik olanda düşünə bilərdim. Biz bir neçə dəfə küsüb-barışmışıq. Bir də gördüm ki, uşaqlar böyüyüblər. Hətta bəzən mənə elə gəlir ki, uşaqlar mən anadan olandan yanımdadırlar. Çünki9-20 yaşımda ana idim. Bəzən eıə bilirlər ki, oğlanlarımla bacı qardaşıq.
-Ola bilərmi onları yerbəyer edəndə sonra...
- Artıq gecdir, 40 yaşım var.
- Vətəndaş nikahına münasibətiniz necədir?
- Pis baxmıram. Amma səmimi deyim ki, yoldaşımdan sonra həyatımda heç kim olmayıb. Olsa, şad olaram (gülür). Biz sevib evlənmişdik, amma sonra o sevgi itdi. Cəmi iki yaş fərqimiz vardı.
- Sevgi necə itə bilər?
- Çünki hətta sevdiyin olsa belə, bezdirici davranışlar o sevgini öldürə bilir.
- Ümumiyyətlə, şəxsi münasibətlərdə böyük yaş fərqinə necə baxırsınız? Məsələn, on yaş kiçik, yaxud on yaş böyük.
- Nəinki böyük, hətta özümlə yaşıd kişilərə qardaşım kimi baxıram. Bir-iki yaş balacadırsa, artıq ona oğlum deyə müraciət edirəm. Amma 10 yaş böyük ola bilər. Ətrafımda özündən yaşca kiçik insanla münasibəti olanxanımlar var. Mənə gülməli gəlir. Deyirəm o səndən balacadır, oğlun kimi baxmırsan?
- Deyirlər ki, tez ailə quran qızlar tez də qocalırlar. Sizin görkəminiz bu deyimi inkar edir.
- Qadının zahirən qocalmağı onun əzablı həyat sürməsiylə bağlıdır. Mən ailənin yeganə övladıyam. Atam məşhur futbolçu olub - Tofiq Axundov. Həmişə də onunla fəxr etmişəm. Yoldaşımdan ayrılsam da, o ayrılığı hiss etməmişəm. İndi də anamla bir yerdəyəm, yaxşı ev-eşiyimiz var. Yəni heç vaxt problem görməmişəm.
- Yeri gəlmişkən, siz də idmançı ola bilərdiniz...
- Atam məni tez-tez cıdıra at sürməyə aparırdı. Hə, onu deyirdim axı. Yəni həyatda heç vaxt əziyyət çəkməmişəm. Qadınların ailəsi dağılanda sanki dünya onlar üçün yıxılır. Mənim üçün belə olmayıb.
- Böyük oğlunuz hərbi xidmətdədir.
- Bəli, Naxçıvanda daxili qoşunlarda xidmət edir. Yanına getməyə icazə vermir. Bakıda olanda bircə dəfə andiçməsinə getdim. Ondan sonra mənəqadağan etdi.
- Əsgər yoldaşları bilirlər ki, anası teleaparıcıdır?
- Yox, demir. Amma zəng edəndə deyir ki, sənə baxıram. Naxçıvanın ART musiqi qrupu var, solisti Rza Zamandır.Bir dəfə verilişin qonağıydı. Bildi ki oğlum orada hərbi xidmətdədir. Bir də xəbər tutudum ki, Naxçıvana qayıdan kimi əmisini də götürüb oğlumun yanına gedib. Siz insandakı ürəyə baxın. Belə adamları görəndə sevinirəm.Heç getməyə də bilərdi. Halbuki çox dostlarımın ora yolu düşüb, getməyiblət.
- Oğlunuzdan danışanda kövrəldiniz...
- On aydır görmürəm də(gülür). Məzuniyyətə gəlməlidir. Bir neçə dəfə növbəsini başqa əsgərləri verib. Deyir ki, birinin atasının ili idi, birinin bacısı nişanlanırdı, növbəmi verdim.
- Həssas insansınız...
- Həssasam, bir filmə baxıb ağlaya bilərəm.
- Kövrək insanlar həm də romantik olurlar.
- Romantikəm.
- Romantik insan uzun müddət hisslərini heç kimlə paylaşmadan necə dayana bilər?
- Neynəməliyəm ki?
- Sosial şəbəkədən, real həyatdan simpatiyasını ifadə edənlər olur?
- O qədər...
- Daha sizə elçi gələsi deyillər ki.
- Mənim uşaqlarım böyükdür. Onlar kiçik olanda bu haqda düşünmədim. Çünki yoldaşımla vaxtaşırı küsüb- barışırdıq. Bəzən bir il küsülü olmuşuq Beləcə yaşa doldum. Həm də hara getsən, sənitanıyırlar. Sən bir adamla tanış olmusansa, harasa gedib çay içməlisən də. Ora başqaları da gəlir və sənitanıyırlar. Qısası, mümkün deyil. Heç vaxt adımın belə məsələlərdə hallanmasını istəmirəm. Uşaqlarımın, atamın adı mənə hər şeydən önəmlidir.
- Yəqin ki,sizə sevgi etirafı edənlərin əksəriyyəti yaşca sizdən balacalardı.
- Düz deyirsiniz. Amma sonradan bəziləriylə dostlaşırıq, deyirəm ki, oğlumun 21 yaşı var. əvvəlcə inanmırlar.
- Özünüz tez ailə qurmusunuz. Oğlunuz da məsələn, 22 yaşında ailə qurmaq istəsə, etiraz edəcəksiniz ?
- Deyəsən bir qızı sevir. Amma tez evlənməsini istəməzdim. Kollecin turizm fakültəsini bbitirib. Əgər istəsə, ali təhsil də alar.
- Nə vaxtsa, televiziya işçisi olmağnızdan istifaə etmisiniz?
- Demək olar ki, yox. Heç maşınımda da “Press” lövhəciyi yoxdur. Yetmiş manat da cərimə olunmuşam.
- Neçə ildir maşın sürürsünüz?
- Səkkiz ildir.
- Yolda, dükanda insanlar sizi tanıyanda reaksiyanız necə olur?
- Tanıyanda deyirəm ki, bacımdır, mən deyiləm. Nəsə utanıram.
İntiqam VALEHOĞLU
Ölkə.Az
