“27 il axıtdığım göz yaşlarım, bundan sonra sevinc, qürur hissi ilə əvəzlənəcək” – Şəhid Əvəz Paşayevin həyat yoldaşı
Öz sevincini “Ölkə.Az”la bölüşən Milli qəhrəmanın həyat yoldaşı Püstə xanım bu günü 27 ildir gözlədiyini bildirib.
“Əvəz haqqında reportaj hazırlananda heç ağlıma da gəlməzdi ki, bu tezliklə onun intiqamı alınacaq. 27 il axıtdığım göz yaşlarım, bundan sonra sevinc, qürur hissi ilə əvəzlənəcək. Oktyabrın 29-da Əvəzin ölümünün 28 ilini qeyd edəcəyik. Müharibə başladığı gündən düşünürdüm ki, kaş Əvəzin ildönümündə ziyarətinə şad xəbərlə - Qubadlının azad olunma xəbəri ilə gedim. Şükür Allaha, bu gün mənə nəsib oldu. İndi Əvəzimin ruhu şaddır, bu gün onun qisası müzəffər ordumuz və Ali Baş Komandan tərəfindən alındı”.
Rahat uyu, şəhidim! Bu gün sən öz azadlığına qovuşdun!
Xatırladaq ki, Əvəz Paşayev 1949-cu il mayın 29-da Ağsu rayonunda doğulub, 1992-ci il oktyabrın 16-da Qubadlı uğrunda gedən döyüşlərdə qəhrəmancasına şəhid olub.
O, birinci Qarabağ döyüşləri zamanı könüllü olaraq orduya yazılıb, ağır döyüşlərdə iştirak edib.
Qubadlıda gedən ağır döyüşlər zamanı ayağından yaralanmasına baxmayaraq, onun təslim olmaq fikri olmur. Həmin an Əvəz bir komandir kimi rəftar edir. O an onun fikri ancaq əsgərlərini səngərdən çıxarmaq olur. Tezliklə komandir buna nail olur və sonuncu döyüşçüyə qədər onları qızğın döyüş nöqtəsindən çıxarır. O son nəfəsinə qədər qəhrəmancasına, ölümün gözünə dik baxaraq vuruşur. Sonda qorxaq düşmənin snayperi ilə vurularaq, müqəddəs saydığı Azərbaycan üçün vətən uğrunda şəhid olur. Onun nəşi 12 gün sərhəd bölgəsində qaldıqdan sonra oktyabrın 28-də ailəsinə təhvil verilir.
Vüsalə Balayeva
Ölkə.Az
