Vahid Ələkbərov: "Neftin qiymətləri daha düşməyəcək"

"LUKOİL" neft şirkətinin prezidenti Vahid Ələkbərov "qara qızılın" dünya bazarlarındakı qiymətlərinin dəyişməsini şərh edib.

Ölkə.az "RİA Novosti" agentliyinə istinadən xəbər verir ki, ABŞ-ın Texas ştatında keçirilən neft üzrə beynəlxalq konfransda çıxış edən Vahid Ələkbərov neft başda olmaqla enerji daşıyıcılarının qiymətlərinin daha düşməyəcəyini bildirib.

"Mən hesab edirəm ki, neftin qiymətləri özünün ən aşağı həddinə çatıb. Bu qiymətdən daha aşağı düşəcəyinə inanmıran. Bu qiymətlərin fonunda artıq qazma işlərinin böyük əksəriyyəti dayandırıldığından neftin qiymətləri daha aşağı düşməyəcək. Biz əminik ki, Arktikadakı yataqların istismara verilməsindən sonra Rusiya dünyada neft hasilatına görə lider olacaq", deyə Vahid Ələkbərov bildirib.

Xatırladırıq ki, bir neçə gün ərzində qiyməti yüksələn neft bu gündən yenə ucuzlaşmağa başlayıb.

Ölkə.az