Nazirlikdən qoca və əlillərə dəstək

Azərbaycanda 12900 nəfərə yaxın tənha ahıl və əlil vətəndaş evlərində sosial-məişət xidməti ilə təmin edilir.

Bu barədə Ölkə.Az-a Əmək və Əhalinin Sosial Müdafiəsi Nazirliyindən məlumat verilib.

Bildirilir ki, 12 min 891 nəfər əmək qabiliyyətli qohumları və ya qanuni nümayəndələri ilə eyni yaşayış məntəqəsində yaşamayan və sosial xidmətə ehtiyacı olan tənha ahıllar, I qrup əlilliyi olan şəxslər və başqasının köməyinə ehtiyacı olan II qrup əlillər (yoluxucu və ya ağır formalı ruhi xəstəlikləri olmadığı halda) nazirlik tərəfindən evlərində sosial xidmətlərlə təmin olunurlar.

Nazirliyin məlumatına görə, onların 10 min 602 nəfəri 70 yaşdan yuxarı olan tənha ahıl vətəndaşlardır. Sosial-məişət xidməti göstərilənlərin 8045 nəfəri şəhər və qəsəbələrdə, qalanları isə kənd yerlərində yaşayır.

Müvafiq qanunvericiliyə uyğun olaraq, sosial xidmətçilər həftədə iki dəfədən az olmayaraq tənha ahıl və əlil şəxslərin evlərinə gəlir, onların ev təsərrüfatında təmizlik və abadlıq işlərini yerinə yetirir, zəruri ərzaq, sənaye və məişət əşyalarının alınması və s. işlərdə xidmət göstərirlər.

Ölkə.Az