24 apreldə kim, harada olacaq?
Bu il 24 aprel tarixi fərqli anım mərasimləri ilə yadda qalacaq.
Məlum olduğu kimi, Türkiyə hər il 18 mart tarixini Çanaqqala qələbəsinin ildönümü olaraq qeyd edirdi. Ancaq 1-ci Dünya Müharibəsinin həmin cəbhəsində döyüş 1915-ci ilin sonuna qədər davab edib və ən kritik tarix aralığı isə 18 mart-25 aprel tarixi hesab olunur.
Ermənilərin qondarma soyqrımının 100-cü ildönümü anmaları Türkiyənin bu il 24 aprelə keçirdiyi Çanaqqala anım mərasimi ilə üst-üstə düşüb. Bu xüsusi tarixdən fərqli nəticələr gözlənilir.
Aprelin 23-də İstanbulda “Sülh Zirvəsi” və 24-25 aprel tarixlərində Çanaqqalada quru savaşlarının 100 illiyi ilə əlaqədar mərasim keçiriləcək. İstanbul və Çanaqqalada keçiriləcək tədbirlərdə 30-a yaxın ölkənin dövlət başçısı, 3 ölkənin parlament spikeri, 3 ölkənin vitse-prezidenti, 5 ölkənin baş naziri, 2 keçmiş prezident, 28 nazir, 7 nazir müavini, 5 beynəlxalq təşkilatın baş katibi iştirak edəcəklər. Toplantı və mərasimlərə 73 ölkədən qonaqların qatılacağı bildirilir. Dövlət başcısı Rəcəb Tayyib Ərdoğan 102 ölkənin dövlət və hökumət başçılarına bu plan çərçivəsində 23-24 aprel tarixində Çanaqqala dəvətnamələri göndərib.
Qeyd edək ki, dəvət olunan dövlət başçıarı arasında Ermənistan prezidenti Serj Sarkisyan da var. Diqqət çəkən dəvətlilərdən biri də isə ABŞ lideri Barak Obamadır. Qələbənin 100 illiyi tədbirində Britaniya Krallığından İngiltərə vəliəhdi şahzadə Çarls ilə iki oğlunun da iştirakı, Avstralyadan 9 minə yaxın, Yeni Zelandiyadan isə 2 minə yaxın insanın gəlişi gözlənilir.
Mərasimə dəvət alan Rusiya prezidenti isə 24 apreldə İrəvana gedəcəyini bildirib. Rusiyanı tədbirdə Sergey Narışkin təmsil edəcək.
Aprelin 24-də İrəvanda keçiriləcək tədbirdə isə ABŞ-ın maliyə naziri Ceykob Lyu iştirak edəcək. Nazirin ABŞ-dan mərasimə qatılanlara rəhbərlik etməsini prezident Barak Obama istəyib.
Ermənistan tərəfindən də qondarma soyqırım şousuna qatılması gözlənilən qonaqların siyahısı açıqlanıb. Tədbirə Rusiya prezidenti Vladimir Putin, Fransa prezidenti Fransua Olland, Kiprin Yunan hissəsinin lideri Nikos Anastasiadis və Serbiya prezidenti Tomislav Nikoliç, həmçinin digər 60 parlamentarilər qatılacaqlar./Atv.az/
Ölkə.Az
