Azərbaycanlı yazıçı dövlət çevrilişinə cəhdə görə 5 illik həbs cəzası aldı

O axtarışdadır.

Ölkə.Az xəbər verir ki, Moldova məhkəməsi qiyabi formada tanınmış Azərbaycan əsilli rus yazıçısı, Azərbaycan Yazıçılar Birliyinın üzvü, ədəbi tənqidçi, publisist Eduard Bağırovu 5 illik həbs cəzasına məhkum edib.

O, Moldovada ictimai-siyasi vəziyyətin destabilizasiya edilməsi cəhdləri və 5 aprel 2009-cu il parlament seçkilərinin nəticələrinə təsir etmək məqsədilə təxribat əməllərin həyata keçirilməsinə görə mühakimə olunub.

Prokurorluq iddia edir ki, yazıçı 2009-cu ilin aprel ayında Moldovadakı iğtışaşlarda aktiv şəkildə iştirak edib. O vaxt parlament seçkilərinin nəticələrindən narazı olan müxalifət prezident administrasiyası və parlament binasına hücum etmişdi. Bağırov 2011-ci ilin yayında həbs olunub və oktyabrda ev ev dustaqlığında saxlanıldığı zaman Moldovadan qaçıb. Bundan sonra yazıçı beynəlxalq axtarışa verilib.

Qeyd edək ki, Eduard Bağırov 1975-ci ildə Türkmənistanda anadan olub. Onun atası azərbaycanlı, anası isə rusdur. Milli mənşəniyə görə Türkmənistanda bir çox problemlərlə üzləşən Eduard ordu sıralarından qaçaraq Moskvaya yollanıb. Burada yükdaşıyan, kiçik ticarətçi, şəxsi tikinti idarəsinin rəhbəri kimi işlərdə çalışıb.

Alternativ ədəbiyyat klubu - "Litprom.ru"nun yaradıcısı və baş redaktoru olub. 2001-ci ildə Moskva Dövlət Su Nəqliyyatı Akademiyasının hüquq fakultəsinə daxil olsa da, sonradan təhsilini yarımçıq qoyub. 2007-ci ildə çapdan çıxmış "Qastarbayter" ("Гастарбайтер") kitabı ilə məşhurlaşıb. Yazıçı "Qastarbayter" romanını həm özünün, həm də başqalarının həyatından götürdüyü əhvalatlar əsasında yazıb, Rusiyaya "çörək dalınca" gedən şəxslərin talelərindən bəhs edib.

Rəşid Mustafazadə

Ölkə.Az