Nepalda bizdən ölən var?

Nepalda baş vermiş zəlzələ nəticəsində Azərbaycan vətəndaşları arasında ciddi xəsarət halı qeydə alınmayıb

Xarici İşlər Nazirliyinin Mətbuat Xidmətinin rəhbəri Hikmət Hacıyev sorğuya cavab olaraq bildirib ki, XİN-nin təlimatı əsasında Azərbaycan Respublikasının Hindistandakı Səfirliyi Nepalda baş vermiş təbii fəlakət ilə əlaqədar Nepaldakı Azərbaycan vətəndaşları ilə təmasları davam etdirir. 

İlkin məlumata əsasənn Nepalda 6-sı uşaq olmaqla, 14 Azərbaycan vətəndaşı arasında zəlzələ nəticəsində ciddi xəsarət halı qeydə alınmayıb. Azyaşlı uşaqlardan biri yüngül sıyrıq xəsarəti alıb və hal-hazırda vəziyyəti yaxşıdır. 

Akkreditasiya dairəsinə Nepalın da daxil olduğu Azərbaycan Respublikasının Hindistandakı Səfirliyi vəziyyəti diqqətdə saxlayır. 

Dünən Nepalın paytaxtı Katmandu yaxınlığında güclü zəlzələ baş verib. Təkanların maqnitudası 7,9 bal gücündə olub. Yerin iki kilometr dərinliyində baş verən təkanlar paytaxt Katmandunun 77 kilometr şimal-qərbində qeydə alınıb.

Zəlzələ nəticəsində Katmandudaki bəzi binalar dağılıb. Qonşu Hindistan və Pakistanda da hiss edilən təkanlar ciddi zərərə səbəb olub.

Bu gün isə Nepalda növbəti güclü zəlzələ meydana gəlib, maqnitudası Rixter cədvəli üzrə 5.6 bal olan yeraltı təkan qeydə alınıb. 

Zəlzələnin episentri paytaxt Katmandudan 41 km məsafədəki Kirtipur şəhərində, ocağı 10 km dərnilikdə yerləşib. Bu zəlzələ nəticəsində dağıntı və xəsarət alanların olub-olmadığı barədə xəbər verilmir.

Şənbə günü qeydə alınan güclü zəlzələ nəticəsində isə ölənlərin sayı 1805-i ötüb. Təbbi fəlakətdə 4700-dən çox insan xəsarət alıb. (ans)

Ölkə.Az