İş yerində xoşagəlməz adamlarla necə davranmalı?

Hər ofisin öz "çətin adamları" olur. Bəzən hətta özünü onları əzişdirməkdən güclə saxlayırsan. Adətən belə xoşagəlməz adamlar üç tipə bölünür.

Onların təsnifatını və belələri ilə doğru davranmaq üsullarını təqdim edirik.

Daim inləyib-sızlayanlar

Onlar ümumi iş ovqatına pis təsir göstərirlər. Daim narazıdırlar. Mütləq neqativ nəsə tapırlar.

Nəzakətlə susmalarını xahiş edəsən? Yox, iş yerində bu, effekt verməz, əksinə, özünə düşmən qazanarsan. Amma onlara dözmək də mümkün deyil axı. Bəs nə etməli?

Onunla mehribancasına söhbət edin. Amma rəğbət nümayiş etdirməkdə əndazəni gözləyin. Adamı praktik söhbətə çəkin. Soruşun ki, vəziyyətdən necə çıxmağı düşünür, hansı ideyası, planı var?

Ya o sizdən uzaqlaşacaq (siz də elə buni istəyirdiniz), çünki ona həll yolu lazım deyil, o, sadəcə, gileylənmək istəyir. Ya da, ən yaxşı halda ciddidən problemin çözülməsi istiqamətində düşünəcək.

Yalançılar

İnsanları manipulyasiya etməyin ən asan yolu onlara yalan danışmaqdır. Əlbəttə, kimsə hər dəfə sizi ittiham edirsə, buna birtəhər dözmək olar - əgər rəhbərlik çağırıb, səbirlə sizin də mövqeyinizi dinləyirsə... Amma reallıqda çox zaman belə olmur axı. Adətən, rəhbər ona ilk müraciət edən adama qulaq asır. Buna görə də ofis yalançılarına qarşı mübarizə aparmaq çətindir.

Bircə yol var: inanmadığınız adamlarla yalnız yazılı şəkildə ünsiyyət saxlayın ki, hər ehtimala qarşı dəlil-sübutunuz olsun. Əgər görüş zamanı hansısa məsələləri müzakirə etməli olursunuzsa, sonra mütləq razılaşmaların bütün bəndlərini məktubla onun e-mailinə göndərin.

Təcavüzkarlar

Onlar işdə hündürdən və narazı tonda danışırlar. Həmişə işgüzar söhbətlərə ittihamla başlayır, daim həmkarlarının əhvalını korlamağa çalışırlar.

Bu adamlar adətən yetərincə ağıllıdırlar və qərəzli olmasalar, elə siz özünüz də onları məmnuniyyətlə dinlərdiniz. Amma bəzən əksi də olur - təcavüzkar qara-qışqırıq salmaqla öz dayazlığını gizləmək istəyir.

Nə badə, beləsinin qarşısında geri çəkiləsiniz. Onlar yalnız güclə hesablaşırlar. Müqavimət, lazım gəlsə, lap təzyiq göstərin. Alternativiniz yoxdur. O, mütləq geri çəkiləcək. Bunun üçün adamın oturduğu tərəfə stəkan atmaq lazım deyil. Sadəcə, sizin üstünüzə çığırmasına, sözünüzü kəsməsinə imkan verməyin. Mümkün olsa, bu zaman onunla zarafat edin.

Bəzi hallarda ona sakitləşməyi təklif edin, əlbəttə, bu, istədiyiniz effekti verməyəcək, amma onda çaşqınlıq yaradacaq.

Ən pisi də budur ki, bu adamları birdəfəlik "yerində oturtmaq" çox zaman mümkün olmur. Ən azından, bir neçə dəfə və ya müntəzəm şəkildə onun gözünün odunu almalısınız.sivil.az

Ölkə.Az