Almaniya konsulluğuna hücum edildi

Hadisə Yəməndə olub.

Ölkə.Az "Sputnik"ə istinadən xəbər verir ki, naməlum şəxslər Yəmənin cənubundakı Aden şəhərində yerləşən Almaniya konsulluğuna hücum ediblər.

Bildirilir ki, husilər bazar ertəsi günü axşam saatlarında hücum aktını reallaşdırıblar. Yaraqlılar yaxınlıqda yerləşən xəstəxananı ələ keçiriblər. Müəssisə işçiləri və xəstələr binanı tərk etmək məcburiyyətində qalıblar. Yəmənin cənubunda yerləşən ən iri şəhərlərdən biri olan Adendə artıq bir neçə gündür ki, küçə döyüşləri davam edir. Döyüşlərdə husilər və Mənsur Hadi tərəfdarları aktiv iştirak edir.

Xatırladaq ki, Səudiyyə Ərəbistanı martın 25-də husilərin Yəməndə ölkənin cənub əyalətlərinə irəliləməsinin qarşısını almaq və BMT-nin rəsmi olaraq tanıdığı prezident Əbd Rəbbi Mənsur Hadinin yenidən hakimiyyətə gətirilməsi məqsədilə Yəmənə qarşı hava hücumlarına başlayıb. 10 ərəb dövləti və ABŞ "Qətiyyət fırtınası" adlanan bu hərbi əməliyyatı dəstəkləyib.

Husilər ötən ilin sentyabrından Yəmənin paytaxta hücum edib, Mənsur Hadi hakimiyyətini devirərək paytaxt Sənanı nəzarətə götürüb. O, ötən ay ölkənin cənubundakı Ədən şəhərinə sığınıb. Üsyançılar cəbun regionlarına irəlilədiyinə görə onun artı ölkədən çıxdığı deyilir. Mənsur Hadi BMT Təhlükəsizlik Şurası və Ərəb Dövlətləri Liqasından husiləri dayandırmaq üçün hərbi yardım istəmişdi.

Rəşid Mustafazadə

Ölkə.Az