Millət vəkili Fuad Muradov baş nazirə müraciət edəcək

Səbail rayonu Yüzbəy Mürsəlov 147 ünvanında yaşayan bir qrup sakin həmin rayonun 29-cu seçki dairəsindən millət vəkili seçilmiş Fuad Muradova müraciət ünvanlayıb.

Ölkə.az-ın məlumatına görə, müraciətdə bildirilib ki, adıçəkilən ünvanda baş verən yanğın zamanı binadakı bir sıra mənzillərə ciddi zərər dəyib. Hadisə baş verən ünvana gedən millət vəkili sakinlərlə görüşüb və vəziyyətlə yerində tanış olub. Məlum olub ki, yanğın zamanı 2 mənzil tam yararsız hala düşüb. Ümumilikdə binada 10 mənzilə ziyan dəyib.

Sakinlər millət vəkilinə yazılı müraciət edərək problemlə bağlı köməklik istəyiblər. Bina sakinləri ilə görüş zamanı Fuad Muradov bildirib ki, məsələ ilə bağlı aidiyyatı qurumlar məlumatlandırılacaq. Sakinlərin sosial vəziyyətini və binaya dəymiş ziyanın böyük həcmdə olduğunu nəzərə alaraq millət vəkili Fuad Muradov baş nazirə müraciət ünvanlayacağını diqqətə çatdırıb.

İntiqam VALEHOĞLU
Ölkə.az