Nigeriyada 160 girov azad edildi

Nigeriyada 160 nəfər “Boko Haram”ın girovluğundan azad edilib.

Ölkə.Az “CNN”ə istinadən xəbər verir ki, Nigeriya ordusu “Boko Haram” terror təşkilatının girovluğundan 160 qadın və uşağı azad edib. Bu barədə yerli mənbələrdən məlumat verilib.

“Biz azad edilmiş şəxslərin dəqiq hesablanması üzərində işləyirik. Dəqiq deyə bilmərəm, amma, fikrimcə, biz 60 qadın və 100 uşağı azad edə bilmişik”, - deyə ordu nümayəndəsi qeyd edib.

Hərbçilərin məlumatına əsasən, girovlar Simbiza meşəsində aparılan xilasetmə əməliyyatı zamanı azad edilib.

Bir müddət öncə Nigeriya ordusunun “Boko Haram” tərəfindən girov götürülmüş 200 qız və 90-dan çox qadını xilas etdiyi barədə xəbərlər yayılmışdı.

Xatırladaq ki, 27 apreldə Nigeriya və qonşu ölkələrdə aktiv şəkildə fəaliyyət göstərən “Boko Haram” terrorçu qruplaşması adını dəyişmişdi. Bildirilib ki, bundan sonra terrorçu qruplaşma “İslam dövlətinin Qərbi Afrika əyaləti” (Islamic State's West Africa Province, ISWAP) adlanacaq.

Qeyd edək ki, Boko Haram ( Camaat’u Əhlus-Sünnə lid-Da’va vəl Cihad) Nigeriyanın radikal islam sektasıdır. O, 2002-ci ildə Nigeriyanın şimalında Məhəmməd Yusif adlə şəxs tərəfindən yaradılıb. Təşkilatın əsas məqsədi bütün Nigeriya ərazisində şəriətin tətbiqi və Qərb həyat tərzinin silinməsidir. 2014-cü ilin may ayında BMT Təhlükəsizlik Şurası tərəfindən terror təşkilatları siyahısına salınıb.

 

Rəşid Mustafazadə

Ölkə.Az