İrəvan Tiflis qarşısında haqq qazanmağa çalışır

Ermənistanın baş naziri Qaribaşviliyə zəng vurdu.

Ermənistanın baş naziri Ovik Abramyanın təşəbbüsü ilə onun Gürcüstanın baş naziri İrakli Qaribaşvili ilə telefon danışığı baş tutub.

Telefon danışığı zamanı Abramyan Ermənistan parlamentinin spikeri Qalust Saakyanın Qarabağda Tsxinvali regionunun nümayəndələri ilə görüşü barədə danışıb.

Abramyan qeyd edib ki, Anatoli Bibilov Qarabağda qeyri-iş günündə şəxsi səfərlə orada olub. Onun Qalust Saakyanla qeyri-rəsmi görüşü olub. Abramyanın sözlərinə görə, görüşdə Gürcüstanın işğal altında olan əraziləri ilə bağlı məsələlər müzakirə olunmayıb.

Ovik Abramyan İrakli Qaribaşviliyə bir daha Gürcüstanın ərazi bütövlüyünü dəstəklədiklərini bildirib və Ermənistan və Gürcüstan arasında dostluq münasibətlərini vurğulayıb.

Əlavə edək ki, dünən Ermənistanın Gürcüstandakı səfiri Yuri Vardanyan Gürcüstan XİN-nə çağırılıb.

Nazirliyin məlumatına əsasən, Gürcüstanın xarici işlər nazirinin müavini Gigi Gigiadze Ermənistan parlamentinin spikeri Qalust Saakyanın Rusiyanın işğal etdiyi Tsxinvali regionunun nümayəndələri ilə görüş faktından ciddi narahatlığını bildirib.

Məlumata əsasən, görüşdə qeyd olunub ki, baş vermiş fakt Ermənistan və Gürcüstan arasında ənənəvi dostluq münasibətlərinə ziddir və ikitərəfli münasibətlərə ciddi ziyan vurur.

Erməni səfir baş vermiş faktla bağlı təəssüfünü bildirib və qeyd edib ki, rəsmi İrəvana Tiflisin mövqeyi dərhal çatdırılacaq. (oxu.az)

Ölkə.Az