Oğurluq edib qaçarkən qəza törətdilər: 1 nəfər öldü

Gəncədə ölümlə nəticələnən yol nəqliyyat hadisəsinin təfərrüatları məlum olub.

Gəncə şəhər Baş Polis İdarəsindən verilən məlumata görə hadisə ötən gün saat 6 radələrində şəhərin Totanlı küçəsində baş verib. Şəhər sakini Hakim Mehdiyev idarə etdiyi “VAZ-21015” markalı avtomobili yolun kənarındakı hasara vurub. Nəticədə avtomobildə olan 25 yaşlı sərnişin Məhəmməd Əzizov dünyasını dəyişib. Avtomobildə olan 600 manat pul, 300 manat dəyərində danışıq kartları və 2 min manatdan artıq dəyəri olan tütün məmulatı və məişət əşyaları ətrafa dağılıb.

Göygöl rayon Polis Şöbəsinin əməkdaşları pul və digər əşyaların oğurluq olduğunu müəyyən ediblər. Belə ki, həmin əşyalar mayın 3-nə keçən gecə Hakim Mehdiyev və Məhəmməd Əzizov tərəfindən Göygöl rayonunun Üçtəpə kəndində kənd sakini Bahar Abbasovaya məxsus mağazadan oğurlanıb.

Faktla bağlı Gəncə şəhər Baş Polis İdarəsi və Göygöl rayon Polis Şöbəsində araşdırma aparılır. (Region TV)

Ölkə.az