“Bakı-2015”: Məşəl estafeti Saatlıda

Birinci Avropa Oyunlarının məşəli Hacıqabul rayonundan sonra Saatlıya gətirilib.

Ölkə.Az Azərtac-a istinadən xəbər verir ki, Saatlı şəhərinin giriş qapısında Hacıqabulda yandırılan Avropa Oyunlarının məşəlinin qarşılanma mərasimi olub. Şəhərin Heydər Əliyev prospektində minlərlə rayon sakini yürüş iştirakçılarını böyük coşqu ilə qarşılayıb.

Avropa Oyunlarının rəmzi qapısında Saatlı rayon Əhmədbəyli kənd tam orta məktəbinin şagirdi, futbolçu Mirqiyas Qiyasov məşəli qəbul edib. Sonra 10 məşəlçi 2,9 kilometr məsafədə yürüşə başlayıb. Növbə ilə məşəli bir-birinə ötürən idmançılar rayon sakinlərinin alqışları ilə Heydər Əliyev prospekti boyunca hərəkət etməklə Heydər Əliyev meydanına gəliblər.

Birinci Avropa Oyunlarının çırağı sərbəst güləş üzrə Azərbaycan çempionu Namaz Cəfərov tərəfindən yandırılaraq, yarışlar başa çatana qədər saxlanılmaq üçün Heydər Əliyev Mərkəzinə təhvil verilib.

Birinci Avropa Oyunlarının məşəlindən götürülən alov buradan Sabirabad rayonuna yola salınıb.

Ölkə.Az