İlhamə Quliyevaya qarşı dələduzluq

Xalq artisti İlhamə Quliyevanın adından onun icazəsi olmadan istifadə ediblər.

Bu barədə Ölkə.Az-a açıqlamasında sənətkar özü bildirib. İ.Quliyevanın sözlərinə görə, Moskvada yaşayan azərbaycanlı prodüser Samirə Zeynalova "Park Bulvar"da keçirəcəyi konsertdə icazəsiz olaraq afişaya onun adını daxil edib:

"Bu Samirə Zeynalova guya prodüserdir, amma dələduzluqla məşğuldur. Dəfələrlə Moskvada belə əməllər törədib. Guya xəstə uşaqlar üçün xeyriyyə konserti təşkil edir. Amma əslində o pulları mənimsəyir".

İlhamə Quliyeva bildirib ki, prodüser bir də eyni addımı atarsa, onun barəsində hüquq-mühafizə orqanlarına müraciət edəcək:

" Xahiş edirəm bu məsələyə ciddi nəzarət etsinlər. Dünən həmin məkanın əməkdaşıyla əlaqə saxlamışam. Yalandan deyir ki, guya bu barədə mənimlə danışıblar. Amma belə şey olmayıb. Əgər Samirə Zeynalova bir daha eyni addımı atsa, ondan hüquq-mühafizə orqanlarına şikayət edəcəyəm".

İntiqam VALEHOĞLU
Ölkə.az