Separatçılardan humanist hərəkət

Ukraynanın şərqində Rusiya meyilli separatçılar 10 gün bundan əvvəl girov götürdükləri iki ABŞ humanitar yardım işçisini azad ediblər.

Bu iki nəfər qiyamçıların Beynəlxalq İxlas Komitəsinin (International Rescue Committee – IRC) Donetskdəki ofisinə basqın zamanı saxladıqları 30 nəfərin arasında idi. İRC-nin başçısı Devid Miliband deyib ki, azad olunmuş iki nəfər hazırda “təhlükəsiz yerdə”dirlər.

Donetsk separatçılarının başçısı Aleksandr Zaxarçenko mayın 9-da bildirib ki, sözü gedən iki nəfər casusluqda şübhəli kimi saxlanılıblar. O iddia edib ki, azad edilən iki işçidən biri Mərkəzi Kəşfiyyat İdarəsinin agenti olub.

Qeyd edək ki, hər gün yüzlərlə humanitar işçi dünyanın müxtəlif yerlərində real təhlükə ilə üzləşir və onların hədəflənməsi beynəlxalq qanunlara ziddir.

Ölkə.Az