Nəqliyyat Nazirliyi: İctimai nəqliyyatda qiymət artımı olmayacaq
Musa Pənahov vahid kart sisteminin tətbiqinin nə zaman başlayacağını açıqladı.
Metroda vahid kart sistemin tətbiqi üzrə işlər artıq başa çatıb, şəhər nəqliyyatda isə vahid kart sisteminin tətbiqi Avropa Oyunlarından sonra mərhələləli şəkildə həyata keçiriləcək.
Bunu Azərbaycanın nəqliyyat nazirinin müavini Musa Pənahov çərşənbə axşamı Bakıda keçirilən TransCaspian 2015 beynəlxalq nəqliyyat sərgisində bildirib.
Nazir müavini qeyd edib ki, artıq vahid kart sisteminin tətbiqi ilə bağlı işlər həyata keçirilir:
“Bu sahədə müvafiq işlər görülüb, proqram təminatı, prosessinq mərkəzinin yaradılması, vətəndaşlara kartların verilməsi, onların doldurulması məsələləri öz həllini tapıb. Vətəndaşlar əldə etdikləri köhnə kartları yeniləri ilə əvəzləyə biləcəklər”.
Yeni avtobusların paytaxta gətirilməsi ilə əlaqədar ictimai nəqliyyatda qiymət artımı məsələsinə toxunan M.Pənahov bildirib ki, ictimai nəqliyyatda bütün xidmətlərin qiyməti tənzimlənir və bu qiymətlər bugünkü qiymətlərlə eyni olacaq:
“Sadəcə vətəndaşlar bilməlidir ki, bu avtobuslar çox yenidir, hətta Avropanın bir çox ölkələrində tətbiq olunmur və biz sərnişinlərdən xahiş edirik ki, həmin avtobuslarla çox diqqətli davransınlar. Tariflər hamısı eynidir, qiymətlərdə dəyişiklik yoxdur”.
Ölkə.Az
