Markov: "Qarabağ münaqişəsində tarixi kompromis gözlənilir"

"Laçın dəhlizinin nəzarətini isə onlar təhvil verməyəcəklər..."

Ölkə.Az-ın "Novosti.az"a istinadən verdiyi xəbərə görə, Rusiya Federasiyası İctimai Palatasının üzvü, Siyasi Təhqiqatlar İnstitutunun direktoru, tanınmış politoloq Sergey Markov bəyan edib ki, Qarabağ münaqişəsində tarixi kompromis gözlənilir.

"Əlbəttə, Qarabağ münaqişəsi yaxın zamanda nizamlanmayacaq, çünki erməni və azərbaycanlılar razılaşmayacaqlar. Tərəflər Qafqazda kompromisin şərtlərini diqtə edəcək böyük moderatorun olacağı halda razılaşa biləcəklər. Ancaq bu gün nə Rusiya, nə ABŞ, nə Türkiyə, nə Aİ, nə İran regionun lideri deyillər", - deyə siyasətçi qeyd edib.

Markovun sözlərinə görə, hazırkı mərhələdə yalnız müvəqqəti tarixi kompromis mümkündür.

"Müvəqqəti, ona görə ki, əgər bu cür kompromis variantı reallaşdırılsa, bu, əlbəttə, münaqişənin yekun həlli deyil. Tarixidir, ona görə ki, bu çox böyük irəliləyişdir. Vəziyyətin bu cür inkişaf variantına əsasən, Ermənistan işğal olunmuş 6 rayon üzərində nəzarəti Azərbaycana verir, Laçın dəhlizinin nəzarətini isə onlar təhvil verməyəcəklər. Buna cavab olaraq Azərbaycan və Türkiyə Ermənistan üzərində blokadanı ləğv edirlər", - deyə Markov əlavə edib.

Rəşid Mustafazadə

Ölkə.Az