Natiq Əliyev: Transxəzər kəmərini kimin çəkəcəyi aydın deyil
Türkmənistanda Avropa İttifaqının təşəbbüsü ilə dördtərəfli görüşlər keçirilib. Hər dəfə görüş üçtərəfli olsa da, bu dəfə məsələyə böyük maraq göstərən Türkiyə də görüşə qatıldı.
Görüşdə Türkiyənin energetika naziri Taner Yıldız, Avropa İttifaqının vitse-prezidenti Maroş Şevçoviç, Azərbaycan tərəfindən mən və Türkmənistan prezidenti yanında Karbohidrogen ehtiyatlarının idarə olunması və istifadəsi dövlət agentliyinin direktoru Yaxşıgəldi Kakayev iştirak etdi.
Bu sözləri Azərbaycanın energetika naziri Natiq Əliyev “Caspian European Club”un təşkilatçılığı ilə keçirilən biznes forumda jurnalistlərə bildirib.
Nazir bildirib ki, Türkmənistan tərəfi türkmən qazının Avropaya çatdırılmasında maraqlıdırlar:
“Türkmənistan keçirilən dördtərəfli görüşdə böyük fəallıq göstərdi. Türkmənistan tərəfi xüsusilə qeyd etdi ki, onlar Transxəzər qaz kəmərinin çəkilməsi, türkmən qazının Avropaya çatdırılmasında çox maraqlıdırlar. Türkmənistan prezidenti Qurbanqulı Berdımuhəmmədovla görüşdə o, türkmən qazının Avropaya nəqli siyasətini bəyəndiklərini, bu məsələni həyata keçirmək istədiklərini vurğuladı”.
Bununla belə, Natiq Əliyev qeyd edib ki, Tranxəzər boru kəmərinin çəkilməsi ilə bağlı bəzi məsələlər həllini tapmayıb:
“Türkmənistanda bildiyimiz kimi şərq-qərb qaz kəməri çəkilir. O kəmər bu il istifadəyə veriləcək. Bu isə o deməkdir ki, Türkmənistan öz qazını Xəzərin şərq sahilinə gətirmək istəyir. Transxəzər boru kəmərini kimin çəkəcəyi məsələsi isə hələ aydın deyil. Türkmənistan Avropaya 30 mlrd. kubmetr qaz satmağa hazır olduğunu bəyan etsə də, bu söz olaraq qalır. Kəmər yoxdur. Bu qazın alıcısının da kim olduğu bilinmir. Kəmərin kim tərəfindən tikiləcəyi, hansı vəsaitin kim tərəfindən cəlb olunacağı da aydın deyil.
“Hesab edirəm ki, bu məsələ hər kəs üçün, ilk növbədə Avropa İttifaqı üçün çox maraqlıdır. Cənab Şevçoviç bu suallara hələ cavab verə bilmir. Onun fikri var ki, Avropa Xəzər konsorsiumu yaradılsın.
Bu konsorsium Avropanın nüfuzlu enerji şirkətlərindən ibarət olacaq. Onlar alıcı qismində çıxış edəcək və Transxəzər kəmərinin çəkilişi bu çərçivədə həll olunacaq. Lakin bütün bunlar hələ aydın deyil, bu iş çox vaxt apara bilər, danışıqlar davam edir” - deyə, nazir bildirib.
Nazir bildirib ki, digər mühüm bir məsələ isə ondan ibarətdir ki, “biz dörd tərəf daimi işçi qrupunun yaradılması barədə qərar qəbul etdik”.
“Bu yaxınlarda Azərbaycanın, Türkiyənin, Avropa İttifaqı və Türkmənistanın işçi qrupuna daxil olacaq nümayəndələri barədə məlumat verəcəyik”, - deyə, o, qeyd edib.oxu.az
Ölkə.Az
