3 illik həbs cəzası alan Mübarək buna görə azadlığa buraxıldı

Penitensiar xidmət məlumat yayıb.

Ölkə.Az dünya mediasına istinadən xəbər verir ki, ötən şənbə günü korrupsiya işi ilə bağlı 3 illik həbs cəzasına məhkum olunan Misirin sabiq prezidenti Hüsnü Mübarək azadlığa çıxıb. Bu barədə məlumat Misirin penitensiar xidmətinin rəhbəri Həsən Suhaqi tərəfindən yayılıb.

"Baş prokurorluq bizə məlumat verib ki, keçmiş prezident müvafiq iş üzrə təhqiqata sərf olunmuş zaman öz cəzasını tamamilə çəkib", - deyə yerli KİV-lər yazıb.

Suhaqi qeyd edib ki, Mübarəkin azadlığa buraxılması onun işlərdən heç birinə birbaşa olaraq aidiyyatının olmaması ilə bağlıdır. Hal-hazırda eks-prezidentin oğlanları həbsdə saxlanılır.

Xatırladaq ki, bir neçə gün öncə Misirin keçmiş prezidenti Hüsnü Mübarək və onun oğulları korrupsiya işi ilə bağlı 3 illik həbs cəzası alıblar. Misir məhkəməsi eyni işə təkrar baxdıqdan sonra bu hökmü verib. 87 yaşlı Mübarək Misirdə 2011-ci ildə baş vermiş üsyan nəticəsində devrilib. Bundan sonra uzun müddət hərbi xəstəxanada qalıb.

İranın "Fars" agentliyi Misirin keçmiş prezidenti Hüsnü Mübarəkin 87 yaşında dünyasını dəyişdiyi barədə məlumatlar yaysa da, sonradan bu informasiya təkzib olunmuşdu.

Rəşid Mustafazadə

Ölkə.Az