Arif Hacılıdan maraqlı açıqlamalar: "Müsavat partiyasında nəsildəyişmə prosesi gedir"

Müsavat başqanı Arif Hacılı mətbuat konfransı keçirib.

Ölkə.Az-ın konfransda iştirak edən əməkdaşının verdiyi xəbərə görə, Arif Hacılı son günlər partiya daxilində baş verən proseslərdən danışıb, jurnalistlərin suallarına cavab verib.

Arif Hacılı bildirib ki, Azərbaycan çox ciddi proseslər ərəfəsindədir. "Ölkədə Birinci Avropa Oyunları keçiriləcək və heç şübhəsiz bütün dünyanın diqqəti Azərbaycana yönələcək" deyən Müsavat başqanı rəhbərlik etdiyi partiyanın bu proseslərdən ölkəmizin xeyrinə yararlanmağa çalışdığını deyib:

"Bütün dünyanın diqqətinin Azərbaycana yönəldiyi bir vaxta Azərbaycanda siyasi məhbusların olması Azərbaycanın beynəlxalq imicinə ziyan vura bilər. Ona görə də biz Azərbaycan hakimiyyətinin buna diqqət yetirməsini istəyirik. May ayının 21-22-də Riqada keçiriləcək Şərq Tərəfdaşlığı Sammitində Azərbaycan yüksək səviyyədə təmsil olunmalıdır. Avropa İttifaqının Şərq Tərəfdaşılığı sazişi Azərbaycan tərəfindən imzalanmalıdır. Ölkədə çox ciddi siyasi islahatlar aparılmalıdır, mətbuat azadlığı təmin edilməlidir. Azərbaycan hakimiyyəti ölkədəki siyasi qüvvələrlə təmas qurur. Biz hökümətinin bu təmaslarını müsbət qiymətləndiririk. Müzakirələr müsbət nəticə verərsə, bu, Azərbaycan cəmiyyətinə xeyir verər".

Arif Hacılı bildirib ki, sabah keçiriləcək iqtidar-müxalifət görüşündə iştiraka da hazırdır, amma:

"Bu görüşlərin yalnız bir tərəf vasitəsi ilə müəyyənləşdirilməsi onun səmərəliliyini azaldır. Müsavat başqanı olaraq sabahkı görüşə məni də dəvət ediblər. Öncədən Avropa oyunlarının müzakirə olunacağını bildiriblər. Belə bir görüş iqtidarla müxalifət görüşü adlana bilməz. Çünki burda burda bütün siyasi partiyaların iştirakı nəzərdə tutulub. İqtidar-müxalifət dialoqu Azərbaycan cəmiyyəti üçün zəruridir. Əgər bizim təkliflərimizi qəbul etsələr, sabah keçiriləcək görüşdə iştirak etməyə hazırıq".

Arif Hacılı bildirib ki, partiyanın yürüş keçirmək üçün meriyaya etdiyi müraciətə müsbət cavab verilmədiyindən Bakı Şəhər icra Hakimiyyətini məhkəməyə veriblər:

Partiya daxilində baş verənlər mediada şişirdilir. Müsavat partiyasının 8-ci qurultayı tarixi bir qurultay idi. Alternativ seçkilər keçirildi. Elə bir görüntü yaradırlar ki, guya partiya daxilində diktatura hökm sürür. Divanın böyük hissəsi yeni seçilmiş şəxslərdi. Müsavat partiyasında nəsildəyişmə prosesi baş verir. Qurultaydan sonra yalnız 9 nəfər çıxardılıb. Partiyadan çıxanların sayı isə 100 nəfərdən azdı. Müsavat partiyasında yenidən təşkilatlanma prosesi gedir. Partiyadan gedənlərə görə qalanları qınamaq olmaz. Partiyanın səksənə yaxın təşkilatı var. Qurultaydan sonra Müsavata 300-dən artıq şəxs daxil olub. Bizi partiyaya daxil olanların sayının çoxluğu maraqlandırır, gedənlərin sayı yox.

Arif Hacılı partiya adından istifadə edib xarici ölkələrə üz tutanlardan da danışıb. Başqan əməkdaşımızın "Müsavatdan gedənlər partiyanı “qardaşlar birliyi" adlandırır. Sizcə səbəb nədir" sualına belə cavab verib:

" Mənim bir çox qohumlarım Müsavat partiyasında fəaliyyət göstərirlər. Bunu müsbət hal kimi dəyərləndirirəm. 2003-cü ilin oktyabr hadisələri zamanı 34 qohumum həbs edilmişdi. 2011-ci ilin aprel hadisələri zamanı Bakı Şəhər Prokurorluğu açıqlama yayaraq bildirmişdi ki, bu iğtişaşları Hacılı qardaşları və Yaqublular törədib. Qardaşım Mustafa Hacıbəyli Müsavat partiyasında məclis üzvüdür. Mustafa Hacıbəyli 18 yaşından AXC-nin üzvü olub. Zaqatalada Müsavat partiyasının bərpa mərkəzinin rəhbəri olub. Müsavat Partiyasının Xətai təşkilatının sədri olub. O, İsa Qəmbərin müşaviri idi, amma mənim müşavirim deyil. Mən fəxr edirəm ki, mənim qardaşlarım demokratik düşərgədədirlər".

Səxavət Məmməd
Ölkə.Az