Azərbaycan və Vyetnamın birinci xanımları İçərişəhərdə

Mehriban Əliyeva və May Thi Han əvvəlcə çay süfrəsinə qonaq oldular.

Azərbaycanın birinci xanımı Mehriban Əliyeva və ölkəmizdə rəsmi səfərdə olan Vyetnam Sosialist Respublikası Prezidentinin xanımı May Thi Han mayın 14-də "İçərişəhər" Dövlət Tarix-Memarlıq Qoruğunda olublar.

Ölkə.Az AZƏRTAC-a istinadən xəbər verir ki, qoruğa gələn Azərbaycanın birinci xanımı Mehriban Əliyeva və Vyetnam Prezidentinin xanımı May Thi Han əvvəlcə çay süfrəsinə qonaq oldular.

İçərişəhərdə gəzinti zamanı qonağa UNESCO-nun Dünya İrsi Siyahısına daxil edilən Dövlət Tarix-Memarlıq Qoruğu, burada aparılan təmir, abadlaşdırma və bərpa işləri barədə ətraflı məlumat verildi. Bildirildi ki, İçərişəhər ərazisindəki müxtəlif əsrlərə aid nadir tarixi memarlıq abidələri qayğı ilə qorunub saxlanılır. Dar, kiçik daşlar döşənmiş küçələrlə hərəkət edən qonaqların diqqətinə çatdırıldı ki, İçərişəhər hər zaman özünəməxsus ab-havası ilə nəinki yerli sakinlərin, həm də xarici turistlərin sevimli məkanlarından biridir.

May Thi Han paytaxtımızın ən qədim hissəsi olan İçərişəhərdə fəaliyyət göstərən əntiq əşyalar mağazasında da oldu, burada satılan və ölkəmizin qədim tarixə və mədəniyyətə malik olduğunu bir daha nümayiş etdirən əşyalara baxdı. Mehriban Əliyeva bu mağazalarda əntiq qab-qacaq, xalça-palaz, tirmə şal, kəlağayı, xurcun, gəlincik və digər əşyaların satıldığını bildirdi. Qonaq folklorumuzun nişanəsi olan buta, zərif naxışlarla bəzədilmiş əşyalara böyük maraq göstərdi.

İçərişəhərlə tanışlığın son məkanı Qız qalası oldu. Azərbaycanın birinci xanımı Mehriban Əliyeva May Thi Hana Bakının ən möhtəşəm tarixi abidələrindən biri olan, əzəməti ilə diqqəti cəlb edən Qız qalası, bu qeyri-adi memarlıq nümunəsinin özəllikləri barədə danışdı. Bildirildi ki, tarixi çox qədim dövrlərə gedib çıxan bu qala XII əsrdə bərpa edilib. Dünya əhəmiyyətli bu abidənin qorunub saxlanması və mövcud görkəmdə gələcək nəsillərə çatdırılması üçün Prezident İlham Əliyevin tapşırıqları əsasında 2009-2013-cü illərdə burada konservasiya işləri aparılıb. Bu gün də əfsanəvi görkəmini qoruyub saxlayan Qız qalasının qarşısında dünyanın hər yerindən gələn turistlərlə rastlaşmaq mümkündür.

Sonda Qız qalası önündə xatirə şəkilləri çəkdirildi.

Daha sonra Azərbaycanın birinci xanımı, Heydər Əliyev Fondunun prezidenti Mehriban Əliyeva və ölkəmizdə səfərdə olan Vyetnam Sosialist Respublikası Prezidentinin xanımı May Thi Han mayın 14-də Xalça Muzeyində olublar.

Azərbaycanın birinci xanımı Mehriban Əliyeva muzeydə qonağa Azərbaycan xalçaçılıq sənəti haqqında danışdı. Bildirdi ki, Azərbaycan bu sahədə dünyanın aparıcı ölkələrindən biridir. 2010-cu ildə Azərbaycanın ənənəvi xalçaçılıq sənəti UNESCO-nun Bəşəriyyətin Qeyri-Maddi Mədəni İrs üzrə Reprezentativ Siyahısına daxil edilib.

Qeyd olundu ki, tətbiqi sənətin nadir nümunələrinin toplandığı Azərbaycan Xalça Muzeyi ayrı-ayrı dövrlərdə müxtəlif ünvanlarda yerləşib. Ölkəmizin nadir incilərindən olan xalçaların daha geniş və səmərəli nümayişi məqsədilə Prezident İlham Əliyevin müvafiq Sərəncamına əsasən muzey üçün xüsusi bina tikilməsi qərara alınıb və 2008-ci il mayın 15-də Dənizkənarı Milli Parkın ərazisində binanın təməlqoyma mərasimi keçirilib.

Vyetnam Sosialist Respublikası Prezidentinin xanımı May Thi Hanın diqqətinə çatdırıldı ki, orijinal üslubda inşa olunan bina bükülmüş xalçanı xatırladır. Burada xalça və xalça məmulatları, metal, parça, geyim və tikmə, keramika, şüşə, ağac, kağız, zərgərlik əşyaları, kitablar, fotoşəkillərdən ibarət nadir kolleksiya mühafizə olunur və bu kolleksiyanın tamaşaçılara təqdimatı üçün ideal şərait yaradılıb.

Muzeyin "qızıl fondu"nu xovlu xalçalar təşkil edir. Onlar bütün kompozisiyaları ilə Azərbaycanın 7 əsas məktəbini - Quba, Bakı, Şirvan, Gəncə, Qazax, Qarabağ və Təbriz xalça məktəblərini təmsil edir. Bu xalçalar insanların, heyvanların, quşların üslublaşdırılmış təsviri, bitkilərin ornamentləri, xalqın həyatını təsvir edən süjetli motivlərlə bəzənib.

Muzeydə həmçinin Böyük Britaniyanın "Viktoriya və Albert" muzeyində saxlanılan məşhur Şeyx Səfi xalçasının sürəti də var. Muzeyin terrasında - açıq səma altında sərgilərin təşkili mümkündür.

Muzeylə tanışlıqdan sonra qonağa xatirə hədiyyələri təqdim olundu.

Azərbaycan Xalça Muzeyi vyetnamlı qonaqlarda zəngin təəssürat yaratdı.