İnquşetiyanın başçısı Şeyxə orden verdi

Rusiya Federasiyası İnquşetiya Respublikasının başçısı Yunusbek Yevkurov Qafqaz Müsəlmanları İdarəsinin sədri Şeyxülislam Allahşükür Paşazadəni “Fəal ictimai-siyasi və dini-maarifçi fəaliyyətinə görə” RF İnquşetiya Respublikasının “Xidmətlərə görə” ordeni ilə təltif edib.

Ölkə.Az Qafqaz Müsəlmanları İdarəsinin məlumatına istinadla xəbər verir ki, təltifetmə mərasimi İnquşetiya Respublikasının Maqas şəhərində keçirilən «Dində mötədillik – sülh, dinc qonşuluq və tərəqqiyə gedən yoldur» mövzusunda keçirilən Beynəlxalq İlahiyyat Konfransında baş tutub.

Yunusbek Yevkurov, Şeyxülislamı Qafqaz üçün dəyərli şəxsiyyət kimi səciyyələndirib və Maqas Konfransında yaxından iştirakına görə ona öz dərin təşəkkürlərini bildirib.

Azərbaycanda hökm sürən dini tolerantlıq və multikultural həyat tərzinin olduqca dəyərli olduğunu bildirən Y. Yevkurov, Allahşükür Paşazadənin rəhbərlik etdiyi nümayəndə heyəti tərkibində Maqasa səfər etmiş Bakı və Azərbaycan Arxiyepiskopu Aleksandrı və Azərbaycandakı Dağ yəhudiləri icmasının başçısı Milih Yevdayevi fəal ictimai-siyasi və dini-ictimai fəaliyyətlərinə görə RF İnquşetiya Respublikası Prezidentinin Fəxri fərmanı ilə təltif etdi.

Ölkə.Az