"Arif Hacılı öncə Müsavatın daxilində Avropa dəyərlərinə hörmət etsin, sonra assosiativ sazişdən danışsın"

Mayın 21 və 22-də Avropa Birliyi “Şərq Tərəfdaşlığı” proqramına üzv ölkələrin Riqa sammiti keçiriləcək. Riqa sammiti bizə nə vəd edir?

Azərbaycan tərəfinin bu sammitə yüksək səviyyədə qatılıb-qatılmaması sual altındadır. Müxalif düşərgə isə Azərbaycanın Riqa sammitində yüksək səviyyədə qatılmasının tərəfdarıdır.

Qeyd edək ki, dünən Müsavatın qərargahında keçirilmiş toplantıda yeni başqan Arif Hacılı bu məsələyə geniş yer ayıraraq Azərbaycanın bu sammitdə yüksək səviyyədə iştirak etməsinin vacibliyindən danışmışdı.

Riqa sammitinin Azərbaycan üçün nə dərəcədə əhəmiyyətli olduğunu politoloq Zərdüşt Əlizadə Ölkə.Az-a şərh edib.

Zərdüşt Əlizadə: "Azərbaycan üçün Riqa sammitinin heç bir əhəmiyəti yoxdur. Avropa Şurasına qoşularkən xeyli öhdəliklər götürmüşdük, ancaq çoxusuna əməl etməmişik. Məhkəmələr hələ də qanuni qərarlar vermir. Assosiativ sazişi imzalayıb yeni öhdəliklər götürüb, onu yerinə yetirməyəcəyiksə, bunun nə əhəmiyyəti var? Cəmiyyətimiz özü də buna hazır deyil. Avropa dəyərləri ilə yaşamayan cəmiyyətin assosativ sazişi imzalamağının nə mənası var?

- Müxalif düşərgə, xüsusi ilə Müsavat başqanı Arif Hacılı dünən keçirdiyi mətbuat konfransında Azərbaycanın Riqa sammitində yüksək səviyyədə iştirak etməli olduğunu və assosativ sazişə imza atmalı olduğunu bildirdi. Buna münasibətiniz...

- Müsavat partiyası partiya daxili həyatında fikir plüralizminə hörmət etmirsə, fərqli düşünəni "qulağından tutub" partiyadan atırsa, Arif Hacılı hansı Avropa dəyərlərindən söhbət edə bilər, assosiativ saziş imzalamasından söhbət edə bilər? Arif Hacılı əvvəl getsin Müsavatın daxilində Avropa dəyərlərinə hörmət etsin, sonra gəlib desin, "gedək assosativ saziş imzalamağa".

- Bəzi şəxslər də Rusiyanın Ukraynadakı apardığı siyasətindən qorxaraq assosativ sazişi imzalamağın tərfdarı olduğunu deyir...

- Ukrayna iqtisadiyyatı ilə Rusiya iqtisadiyyatı bir-birinə daha sıx bağlıdır. Yəni Ukrayna daha çox Rusiyadan asılıdır. Ukraynanın əhəmiyyəti Rusiya üçün daha böyükdür. Azərbaycanla Rusiya arasında isə o cür inteqrasiya yoxdur. Rusiya da neft satır, biz də neft satırıq, Rusiya da qaz satır, biz də qaz satmağa hazırlaşırıq. Bu məsələdə bizim Rusiyadan asılılığımız azdır.

Səxavət Məmməd
Ölkə.Az