Kənd Təsərrüfatı Nazirliyinin işçiləri yarmarkalarda qiymət tənzimləməlidirlərmi?

Son zamanlar kənd təsərrüfatı məhsullarının satış yarmarkalarında qiymət artımları müşahidə olunur. Bazarlara məhsul gətirən kəndlilər məhsuldarlıq aşağı olsuğu üçün qiymətləri artırmaq məcburiyyətində qaldıqlarını deyirlər. Belə hallarda isə Kənd Təsəsrrüfatı Nazirliyinin əməkdaşları buna imkan vermir. Nəticədə yenə də ziyan çəkən kəndli olur.

Məsələ ilə bağlı Ölkə.az-a açıqlama verən Azad İstehlakçılar Birliyinin sədri Eyyub Hüseynov bildirib ki, Kənd Təsərrüfatı Nazirliyinin işçiləri bazarlarda qiymət tənzimləməməlidirlər:

"Bazardakı qiymət tələb və təklif əsasında formalaşır normal şəraitdə. Kənd Təsərrüfatı Nazirliyinin işçiləri yarmarkalarda, bazarlarda kəndlinin başı üstündə durub qiyməti artırmamaq göstərişi verməməli, torpağı, məhsulu becərmək qaydalarıni öyrətməlidirlər ki, bolluq olsun. Belə olan halda qiymətlər də aşağı olacaq. Bazar özü-özünü tənzimləyəcək. Süni qiymət artımları da baş verməyəcək. Kəndlinin məhsulu bazara az itki verməklə çıxara bilməsi təmin edilməlidir. Nazirliyin işçiləri bazarlarda qiymət tənzimləməməlidirlər. Soyuducu anbarlarda kəndlinin məhsul saxlaması heç də onun ürəyincə deyil. Qiymətlər həddindən artıq yüksəkdir. Anbarların həcmi camaatın tələbatına uyğun deyil. Bütün bu hallar mövcud problemlərin yaranmasına səbəb olur. Ölkə prezidenti süni qiymət artımlarının qaşısının alınması istiqamətində dövlət orqanlarına tapşırıqlar verir. Lakin kənd təsərrüfatı yarmarkalarında məhsulların qiyməti durmadan artır. Bunun başlıca səbəblərindən biri bu sahəyə nəzarət edən dövlət orqanlarının qeyri-effektiv siyasətidir. Bu işdə də məsuliyyət Kənd Təsərrüfatı Nazirliyinin üzərinə düşür".

Həsən
Ölkə.az