Suriya hakerləri ABŞ-ın məqsədlərini açıqladı
"ABŞ hökuməti terrorçulara suriyalıları öldürməyi öyrədir"
Ölkə.Az "Al Arabia" teleşirkətinə istinadən xəbər verir ki, ABŞ-ın nüfuzlu "Washington Post" qəzetinin saytının mobil versiyası suriyalı hakerlər tərəfindən sındırılıb.
Hakerlər qəzetin oxucularına ABŞ hökumətinin əsl məqsədləri barədə həqiqəti deməyə çalışıblar. Saytın mobil versiyası cümə axşamının ikinci yarısı "Suriya elektron ordusu"nun hakerləri tərəfindən hücuma məruz qalıb.
Sayta daxil olmaq istəyən istifadəçilər açılan pəncərədə aşağıdakı sözlərlə rastlaşıblar:
"Siz "Suriya elektron ordusu"nun haker hücumuna məruz qaldınız".
"OK" düyməsini vurduqdan sonra isə növbəti mesaj görünüb:
"ABŞ hökuməti terrorçulara suriyalıları öldürməyi öyrədir".
"Washington Post"un rəsmi nümayəndəsi Şayleş Prakaş haker hücumu faktını təsdiq edərək qeyd edib ki, istifadəçilərdən heç birinə zərər dəyməyib.
Qeyd edək ki, "Suriya elektron ordusu" prezident Bəşər Əsəd rejiminə loyal münasibətin tərəfindədir.
Rəşid Mustafazadə
Ölkə.Az