Ramin Hacılı: "Heç kim evlənməyə tələsməsin"
Bu gün gənc publisist-şairə Aysel Əlizadə və ölkədə kifayət qədər tanınan fəal gənc Ramin Hacılının toy mərasimidir.
Ölkə.az olaraq toya saatlar qalmış tərəflərin evliliyə olan münasibətlərini öyrənmək və toydanqabaqkı həyacanla maraqlanmaq istədik. Cütlüklə ayrılıqda telefon bağlantısı quraraq eyni sualları hər ikisinə ünvanladıq. Həmin dialoqu sizə təqdim edirik:
- Evlilik dedikdə ilk təsəvvür etdiyiniz mənzərə nədir?
Aysel Əlizadə: “İndi ancaq qaçhaqaç deməkdir mənim üçün” ( gülür)
Ramin Hacılı: “Birgə yaşayış, yəni artıq tək yaşamırsan. Evlilik dedikdə təsəvvür etdiyim mənzərə iki insanın bir yaşadığı ev. Bu günə qədər o evdə mən istədiyim kimi davranıb, istədiyim kimi yaşayırdımsa, daha bu gündən sonra tək olmayacaq”.
- Sizcə, evlilikdə qadının işi çətindir, yoxsa kişinin?
Aysel Əlizadə: “Hər ikisinin, çünki böyük bir öhdəliyin altına girirlər. Ailə hər iki tərəf arasında bərabər paylanmalıdır. Kədəriylə, bütün sevinci ilə, hər şeyi ilə birlikdə”.
Ramin Hacılı: “Kişinin işi daha çətindir evlilikdə, nəinki qadının. Çünki kişi evin bütün məsuliyyətini çiynində daşımalıdır. Qadın da təbii ki, məsuliyyət daşıyır, amma bütün sorumluluq kişinin çiynindədir. Əgər bir kişi qadını ilə birlikdə yaşayırsa, o evdə yaranan hər hansı bir problemlə bağlı birinci məsuliyyət kişinin boynundadır. Ona görə də, kişinin işi daha məsuliyyətli və çətindir”.
- Evlilik fərdi azadlığa nə qədər təsir göstərir?
Aysel Əlizadə: “Heç bir təsir göstərmir, əksinə evlilik mənə görə, azadlığa çıxmaqdır. Əgər dünənə qədər hər hərəkətimi götür-qoy edirdimsə, tutaq ki, subay bir qadın, və yaxud gözdə-üzdə olan bir xanım kimi indi isə daha rahatam. Çünki indi həyatımda elə bir adam var ki, o, məni hər şeydən qoruyur”.
Ramin Hacılı: “İnsanların hər biri istəyərək, və ya istəməyərək öz azadlıqlarının bir qismindən imtina edib digərini seçirlər. Bu o insanların həyatlarına müsbət təsir göstərir. Buna görə də, bəzi fərdi azadlıqlardan rahat şəkildə imtina edə bilirlər. Məsələn insanlar dövləti quranda da öz azadlığının bir qismindən imtina edib, birləşib qurublarsa, o cümlədən də ailəni quranda bu şəkildə bir qism azadlıqlardan insanlar imtina edirlər. Həmçinin bir təşkilat quranda da, hər hansı bir birlik yaradanda da insanlar eyni cür davranır”.
- Nikah müqaviləsi, evlilik şərtləri kimi razılaşmalar olub?
Aysel Əlizadə: “Yox, sadəcə o barədə düşünməyə vaxtımız yoxdur”.
Ramin Hacılı: "Bizim evlilik şərtlərimiz ictimai olub və hər kəs bunu görüb. Şərtlər mediada çap olunub. O şərtləri də mən qəbul etmişəm. Düşünürəm şərtlər qadın tərəfindən olmalıdır, bizdə də belə oldu. Ancaq bunu rəsmi qaydada etməyə gərək duymadıq”.
-Bəs evlilik öncəsi tibbi yoxlanışdan necə, keçdiniz?
Aysel Əlizadə: “Ehtiyac olmadı”.
Ramin Hacılı: “Gərək duymadıq”
- Bal ayını harada keçirməyi düşünürsünüz?
Aysel Əlizadə: “Hələ onu planlaşdırmamışıq, toydan sonra sizə dəqiq deyərik (gülür)
Ramin Hacılı: “Təkliflər çoxdur. Biz o təkliflər içərisindən ən çətinini seçdik deyə bir ay sonra Bosniya Herseqovina, Serbiya və Monteneqronu gəzməyi düşünürük”.
- Adətən toya bir qədər qalmış cütlüklərdə arıqlamaq istəyi yaranır, bəs sizdə necə?
Aysel Əlizadə: “Yox, ehtiyyac yaranmadı. Məncə mənim formam yaxşıdır”.
Ramin Hacılı: “Belə bir ehtiyyac bir neçə ay əvvəl yarandı və müəyyən addımlar, tədbirlər görmək məcburiyyətində qaldım”.
- Hələ də subay qalanlara nə tövsiyyə edərdiniz?
Aysel Əlizadə: “Subay yox, ancaq yarına çatmayanlara arzu edərdim ki, çatsınlar. Axtarmaqdan qorxmasınlar. Sevgili ayaqqabı deyil. Necə deyim, biz toya gedəndə bir ayaqqabı üçün 50 dənə dükana gedirik, ancaq həyatımıza çıxan hər kişini öz həyatımızın kişisi sayırıq və ona ömürlük bağlanırıq. Elə ola bilməz. İnsan 30 il bir ayaqqabını geyinmir, tapmaq lazımdır. Qorxmaq lazım deyil. Görürük alınmadı, deyirik alınmadı. O adamın günahı deyil, o bizim adamımız deyil, sadəcə qabağımıza çıxan ilk adamdır. Bundan sonra bizim adamımız var, onun üçün isə yol getmək lazımdır”.
Ramin Hacılı: “Mən tövsiyyə edirəm ki, heç kim evlənməyə tələsməsin. Çünki bunun üçün zaman özü gəlib çıxmalıdır. 27-28 yaşından tez evliliyi mən heç kimə tövsiyyə etmirəm, çünki bəzi gənclik çılğınlıqlarını yaşamadan sonradan evlilik problemlərə səbəb ola bilər düşünürəm. İkinci tövsiyyəm ondan ibarətdir ki, tanış olub, həqiqətən tanımaq və ondan sonra evlilik qərarı vermək lazımdır. Tanımadan, bilmədən evlilik qərarı vermək, tələsmək bu istiqamətdə atılan böyük yanlış addım hesab edirəm və buna yol vermək olmaz. Üçüncüsü və ən əsası da bütün cütlüklər evləndikləri təqdirdə birmənalı şəkildə kişinin hüquqlarından çox məsuliyyətini nəzərə almalıdırlar”.
Ailə sözü ərəbcə tərcümədən bir-birlərinə dayanan, etimad edən insanlar üçün işlədilir ki, bu gün də Aysel Əlizadə və Ramin Hacılı bu ailəni qururlar.
Ölkə.Az kollektivi olaraq Ramin Hacılı və Aysel Əlizadə cütlüyünə gələcək həyatlarında uğurlar arzulayırıq.
Qeyd edək ki, toy mərasimi bu gün baş tutacaq.
Fatimə İbrahimova
Ölkə.az
