Azərbaycanda qeyri-adi ördək balası dünyaya gəlib

Normal qaydada yeriyə bilmir.

Ölkə.Az "APA" agentliyinə istinadla xəbər verir ki, Lənkəran rayonunun Zövlə kənd sakini, 54 yaşlı İltifat Kazımovun fərdi təsərrüfatında qeyri-adi ördək balası dünyaya gəlib.

Ördəyin bir neçə gün öncə yumurtadan çıxardığı balalardan biri qeyri-adiliyi ilə hamının təəccübünə səbəb olub. Balanın hər iki ayağı tərsinə çevrildiyindən o, yalnız arxası üstündə qalarkən gəzməyə cəhd edir. Normal qaydada isə yeriyə bilmir.

Şəxsi təsərrüfatında xeyli sayda quş saxlayan ev sahibinin sözlərinə görə, quşçuluqla məşğul olduğu 50 ilə yaxın müddət ərzində ilk dəfədir belə hadisə ilə qarşılaşır.

“Ördəklərin ayaqları həmişə ayaqları qabaqda olub. Bu ördək balasında ayaqlar arxa hissədədir. Təsərrüfatda birinci dəfədir belə möcüzə ilə rastlaşıram. Əlli ilə yaxındı mən təsərrüfatla məşğulam. Bala su da içir, dən də yeyir. 5-6 gündür doğulub. Hərəkət edə bilmir. Sinəsi üstə yatır”.

Mütəxəssislərin fikrincə, belə anomal hallar hər şeydən əvvəl quşda genetik formanın pozulması, mayalanmanın qeyri-normal şəraitdə olması ilə əlaqədar ola bilər. Burada həmçinin iqlim dəyişkənliyinin də müəyyən qədər təsiri mümkündür.

Qeyd edək ki, bala ördək normal qidalansa da, gəzə bilmir.

Ölkə.Az