Deputatdan peşə təhsili ilə bağlı təkliflər: Bu sahədə kadr çatışmazlığı hiss olunur
“Azərbaycan və Türkiyə Hökumətləri arasında peşə təhsili sahəsində əməkdaşlığa dair “Protokolun” təsdiq edilməsi haqqında Qanun layihəsi müzakirəyə çıxarılraq qəbul edilib. Sənədə əsasən, ölkəmizdə 2 peşə təhsili verən müəssisənin bazasında Türkiyə Respublikası Milli Təhsil Nazirliyinin dəstəyi ilə, 2 yeni peşə təhsili müəssisəsinin təsis edilməsi nəzərdə tutulur”.
“Ölkə.az” xəbər verir ki, bunu deputat İltizam Yusifov deyib. O bildirib ki, müasir dövrdə, iqtisadiyyatda davamlı inkişaf, iqtisadi artım - əsasən insan kapitalı hesabına həyata keçirilir:
“Bütün dünyada insanların təhsilinə, xüsusən peşə təhsilinə, bu sahədə kadr hazırlığına yönələn investisiyaların gəlirlik səviyyəsi digər sahələrdən dəfələrlə üstündür. Son illədə bu sahədə bir qədər kadr çatışmamazlığı hiss olunur.
Bu gün ümumi təhsil müəssisələrini bitirən insanların təxminən 37 %-i ali təhsil müəssisələrinə , 13% -i texniki peşə məktəblərinə üz tutur. Qalan 50 %-i isə əmək bazarına hazırlıqsız, heç bir peşəsi olmadan daxil olurlar.
Dövlət statistika komitəsinin 1991-2020 illəri əhatə edən dövr üçün bəzi rəsmi rəqəmlərinə nəzər salsaq görərik ki, bu dövrdə Peşə təhsil müəssisələrinin sayı-40 %-ə qədər, peşə təhsil müəssisələrinə qəbul olunanların sayı 3.2 dəfə, peşə təhsil müəssisələrində təhsil alanların və bitirənlərin sayı 3.5 dəfə azalıb
Peşə təhsilinin həcminin azalması fonunda ali təhsil müəssisələrində təhsil alan tələbələrin sayı isə bu illər ərzində təxminən 2 dəfəyə yaxın artıb”.
Millət vəkili bu azalmanın obyektiv səbəbləri olduğunu deyib:
“Peşə məktəblərinin fəaliyyətindəki tənəzzül artıq ötən əsrin 80-ci illərinin sonundan özünü büruzə verməyə başlayıb.
Bu gün ölkəmizdə, əmək bazarında, xüsusən də sənayedə Ali təhsilli kadrlara ehtiyac olmadığı halda, peşə təhsilli bir qaynaqçıya və ya qulləli kran üzrə mütəxəssisə və s.digər peşə təhsilli işçilərə böyük ehtiyac duyulur.
Məlumat üçün deyim ki, 2019-cu ildə Kənd təsərrüfatı üzrə ali təhsil diplomu alan mütəxəssislər həmin ildə ali təhsil diplomu alanların cəmi 1% -ni təşkil edir. Bu, çox kiçik rəqəmdir. Bəs onda biz kənd təsərrüfatını necə inkişaf etdirək?
2019-cu ildə bakalavr+magistr diplomu alan tələbələrin sayı 37562 nəfər olub, kənd təsərrüfatı üzrə ali təhsil diplomu alan mütəxəssislərin sayi 433 nəfər təşkil edib. Bu, cəmi diplom alanların 1% - i deməkdir.
Biz iqtisadiyyatımızı inkişaf etdirmək üçün mütləq bu faktları nəzərə almalıyıq və mütəxəssislərin hazırlanmasında peşə təhsilinə böyük önəm verməliyik”.
44 günlük müharibədə Ali Baş Komandanın rəhbərliyi altında müzəffər ordumuzun qələbəsini xatırladan deputat peşə təhsilində müasir texnologiyaların rolunu xüsusi vurğulayıb:
“Ali təhsildə diplom alan tələbələrin sayında mühəndislik sahəsi cəmi 20% təşkil edir. Bütün bunları nəzərə alaraq peşə təhsilinin effektivliyini təmin etmək üçün müvafiq quurmlara öz təkliflərimi təqdim edirəm:
1. Dünya praktikasında olduğu kimi peşə təhsili artıq ümumitəhsil məktəbləri səviyyəsində öz həllini tapmalıdır.
2. Sənayedə işəgötürənlərə imkan vermək lazımdır ki, peşə hazırlığında yaxından iştirak etsinlər və özləri kadr hazırlasınlar.
3. Növbəti büdcə müzakirələri zamanı Peşə təhsili müəssisələrinin maddi-texniki bazasını möhkəmləndirmək üçün biz bu sahəyə ayrılan vəsaiti diqqətdə saxlamalıyıq.
4. Peşə təhsilinin icbariliyini təmin olunmalı və işəgötürənlər bunu mütləq nəzərə almalıdırlar.
5. peşə təhsilinə əsasən əhalinin nisbətən aztəminatlı təbəqəsinin getdiyini nəzərə alsaq peşə təhsili dövlət hesabına, ödənişsiz olmalıdır.
Biz ölkədə peşə təhsilinin daha da inkişaf etdirməliyik. Bu məsələ daima aktual olmalıdır və bizim gələcək inkişafımızda mühüm rol oynamalıdır”.
