Avtovağzal rəhbərinin şirkəti məhkəməyə verilib
"Azerbaijan Ground Services" MMC ilə bağlı məhkəməyə müraciət edilib.
Ölkə.Az-ın xəbərinə görə, proses Bakı Şəhəri Binəqədi Rayon Məhkəməsində Fərid Əmirəliyevin sədrliyi ilə keçiriləcək.
Sözügedən şirkətə məxsus avtomaşın inzibati xətaya yol verdiyi üçün məhkəməyə müraciət edilib. Belə ki, "Azerbaijan Ground Services" MMC-nin istifadəsində olan nəqliyyat vasitəsi yol hərəkəti qaydasını pozduqdan sonra məlumat şirkətə göndərilib. Lakin sorğuya 5 gün müddətinə cavab verilməyib. Bununla bağlı olaraq məhkəməyə müraciət edilib.
Qeyd edək ki, şirkət avtobus sərnişin daşınması ilə məşğul olur. MMC-nin qanuni təmsilçisi Camal Sadıxovdur. O, Bakı Beynəlxalq Avtovağzalın rəhbəridir.
Məlumat üçün bildirək ki, qaldırılan iddia təmin olunarsa, İnzibati Xətalara Məcəlləsinin müvafiq maddəsinə əsasən, vəzifəli şəxsləri yüz əlli manat məbləğində, hüquqi şəxsləri isə üç yüz manat məbləğində cərimə gözləyir.
