Çörəyin qiyməti arta bilər?

"Azərbaycan ərzaq buğdasına olan ehtiyacını tam olaraq idxalın hesabına ödəyir. Bu isə o deməkdir ki, Azərbaycanda ilk növbədə buğdanın, unun, çörəyin qiyməti dünya bazarındakı qiymətindən asılı olacaq".

Bu fikirləri Ölkə.az-a açıqlamasında ekspert Vahid Məhərrəmov deyib. Onun sözlərinə görə, əgər ərzaq buğdasının qiyməti dünya bazarında ciddi artarsa bu öz növbəsində Azərbaycanda qiymət artımasına səbəb olacaq:

"Əksi baş verəndə bizdə təəssüflər olsun ki, qiymət enməsi baş vermir. Baxmayaraq ki, dünya bazarında neftin qiyməti kəskin ucuzlaşıb, ancaq bununla paralel ərzaq buğdasının qiymətində enmə müşahidə olunmur".

V.Məhərrəmov qeyd edib ki, bəzi ölkələr son zamanlar yaranmış vəziyyətdən sui-istifadə edirlər:

"Bir çox ölkələr yaranmış vəzyyətdən sui-istifadə edərək buğdanın ixracında aksiz tətbiq ediblər. Xüsusən Rusiya hər ton üçün 37 avro əlavə ödəniş tətbiq edir. Bu da onu deməyə əsas verir ki, indi idxal olunan buğdanın qiyməti əvvəlki illərdən fərqli olaraq nisbətən baha başa gəlir. Əgər Qazaxıstan kimi ölkələr də aksiz tətbiq edərsə, idxal edən ölkə olduğumuz üçün bu qiymət bizdə daxili bazara öz təsirini göstərəcək".

Həsən
Ölkə.az