1500 illik Bibliya: "İsa Məsih çarmıxa çəkilməyib"

1500 yaşı olan Bibliya iddia edir ki, İsa Məsih çarmıxa çəkilməyib.

Ölkə.Az dünya mediasına istinadən xəbər verir ki, 1500 il əvvəl yazılan və bu günlərdə Türkiyədə aşkar olunan müqəddər Bibliya kitabı Vatikanda narahatlığın yaranmasına səbəb olub.

Buna səbəb apostol Pavellə səyahət edən və İsa peyğəmbərin şagirdlərindən olan Varnavanın İncilini özündə əks etdirməsidir. Qədim əlyazma Ankaranın Ədliyyə binasında təkrar üzə çıxıb. İndi isə o şəhərin Etnoqrafiya muzeyinə veriləcək. Əlyazmanın səhifələri dəridəndir və üzərindəki yazılar aramey dilinin dialekti sayılan assur dilindədir.

Tehranın dini hökuməti iddia edir ki, kitabdakı mətnə əsasən, İsa Məsih çarmıxa çəkilməyib, Allahın oğlu olmayıb, peyğəmbər olub. Kitabda deyilir ki, İsa Məsih sağ olaraq göylərə ucalıb və onu satan İuda İskariot çarmıxa çəkilib. Mətn həm də sonuncu İmam Mehdinin zühuru barədə məlumat verir.

Vatikan hadisə ilə bağlı narahatlığını ifadə edib və Türkiyə hökumətini katolik mütəxəssislərlə birlikdə kitabın məzmununu dəyərləndirməyi xahiş edib. Hesab olunur ki, Nikey kilsəsi Varnavadan olan İncili senzuraya məruz qoyaraq Bibliyadan çıxarıb.

Qədim əlyazmanın nüsxəsi 28 milyon dollar olaraq qiymətləndirilib.

Rəşid Mustafazadə

Ölkə.Az