Politoloq: "Avropa Birliyi Türkiyədən qorxur"

"Avropa Birliyi Türkiyəni üzvlüyə qəbul etməsə də iqtisadi sahədə bu ölkə ilə əməkdaşlığı davam etdirir. İqtisadiyyatı genişlənən, maliyyə imkanları artan Türkiyə bölgənin əsas enerji paylayıcı dövlətinə çevrilir. Bu da Avropa Birliyinin diqqətini cəlb edir".

Bu fikirləri Ölkə.az-a açıqlamasında Atlas Araşdırmalar Mərkəzinin rəhbəri, politoloq Elxan Şahinoğlu deyib. O qeyd edib ki, Avropa Birliyi və Türkiyə iqtisadi əməkdaşlıqda maraqlıdırlar:

"Avropa Birliyi Türkiyə ilə iqtisadi münasibətləri genişləndirməkdə maraqlıdır. Bu əslində Türkiyənin özünün də xeyrinədir. Əgər qarşısına Avropa Birliyinə üzv olmağı məqsəd qoysa Türkiyə bu hədəfə çata bilər. Çünki məhsullarının çox hissəsini Avropa Birliyi ölkələrinə satır. Hər iki tərəf iqtisadi əməkdaşlıqda maraqlıdır".

E.Şahinoğlu hesab edir ki, iqtisadi əməkdaşlıq Türkiyənin Avropa Birliyinə üzvlüyünü sürətləndirməyəcək:
"İqtisadi ələqələr davam edir. Lakin təəsüflər olsun ki, bu Türkiyənin Avropa Birliyinə üzvlüyünü reallaşdırmır. Bu məsələdə süni əngəllər də çoxdur. İnanmıram ki, iqtisadi əməkdaşıq süni əngəllərin qarşısını ala bilsin. Avropa Birliyinin rəsmiləri Türkiyədən qorxduqlarını dəfələrlə bəyan ediblər. Əsas gətirirlər ki, Türkiyə böyük dövlətdir, ordusu, iqtisadiyyatı güclüdür və bu da onlara problemlər yarada bilər. Hesab etmirəm ki, iqtisadi əməkdaşlıq Türkiyənin Avropa Birliyinə üzvlüyünü sürətləndirəcək".

Məlumat üçün bildirək ki, Türkiyənin Avropa Birliyi məsələləri üzrə naziri Volkan Bozkır mayın 18-də Brüsseldə keçirdiyi mətbuat konfransında iqtisadi məsələlər üzrə danışıqlara başlamaq haqda qərar qəbul edildiyini bildirib.

Həsən
Ölkə.az