"Köçəryan ssenarisi" necə davam edəcək: çevrilişə cəhd... - ŞƏRH
Baş nazir vəzifəsini icra edən Nikol Paşinyanın Qarabağ müharibəsində ağır məğlubiyyətlə üzləşməsinə və ölkəsinin verdiyi itkilərə baxmayaraq onun rəhbərlik etdiyi “Vətəndaş razılaşması” partiyasının parlament seçkisindəki qələbəsi və yenə hökuməti formalaşdıracağı
Ermənistan əhalisinin əksəriyyətinin Azərbaycanla yeni müharibə istəməməsi deməkdikdir. Bununla yanaşı, bu, qonşularla münasibətlərin nizamlanmasında maraqlı olmanın göstəricisidir. Paşinyanın qələbəsi, həm də Ermənistan əhalisinin əksər hissəsi seçkidə “Qarabağ klanına” və Rusiyaya “yox” deməsidir”.
Bunu “Ölkə.Az”a açıqlamasında politoloq Elxan Şahinoğlu deyib.
Politoloq əlavə edib ki, Paşinyanın qələbəsi, həm də Ermənistan əhalisinin əksər hissəsinin Qarabağa görə ölkələrini itirmək istəməməsidir.
Onun sözlərinə görə, Rusiya birmənalı Nikol Paşinyanın rəqibi Robert Köçəryanı dəstəkləyirdi və hərtərəfli dəstək verirdi.
“Ermənilər isə artıq müharibə istəmədiyindən müharibə çağırışı səsləndirən siyasətçini hakimiyyətə gətirmək istəmədilər. Beləliklə, Nikol Paşinyan hökuməti təkbaşına formalaşdıracaq. Buna baxmayaraq Robert Köçəryan hələ ki seçkinin nəticəsini tanımır. Ancaq zamanla o da mövcud reallığı qəbul etməkdən başqa alternativi qalmayacaq. Köçəryan ölkəni qarışdırmaq və çevriliş barədə düşünürsə, nəticə onun və Ermənistanın xeyrinə olmayacaq”, - o qeyd edib.
Politoloq bildirib ki, Robert Köçəryanın da müəyyən fasilədən sonra siyasətə qayıtmasının və belə göstəri əldə etməsi özü bir nəticədir.
“Artıq “Qarabağ klanı” Köçəryanın liderliyində yenidən Ermənistan siyasətinə qayıtdı. Rusiya üçün Ermənistanda indiki şərtlər altında bu da bir nəticədir. Moskva Robert Köçəryanı baş nazir kürsüsünə otuzdura bilməsə də, onu ən azı həbsdən çıxartdıraraq parlamentdə ana müxalifətin lideri kürsüsünə otuzdura bildi. Kreml bundan sonra Ermənistanda yenə zamana işləyəcək və Paşinyanın büdrəməsini gözləyəcək”.
Azərbaycanla münasibətlərə gəldikdə isə politoloq deyib ki, bu Paşinyanın quracağı hökümətin tərkibindən və atacağı addımlardan asılı olacaq: “Paşinyan yeni hökumətində revanşist baxışlara malik siyasətçilərə və diplomatlara yer verməməlidir. Bu onun özü üçün faydalıdır. Paşinyan Azərbaycana tərəf bir addım atacağı halda Bakı qarşılıqlı addım atmağa hazır olacaq. Ona görə də Nikol Paşinyan bölgədə real sülh və əməkdaşlıq istəyirsə, birincisi, Azərbaycanın və Türkiyənin ərazi bütövlüklərini tanımalı, ikincisi, Zəngəzur dəhlizinin açılmasına mane olmamalıdır.
Paşinyanın atacağı bu iki addımın qarşılığında Azərbaycan-Ermənistan sərhədinin demilitasiyasının və demarkasiyasının sürəti artacaq, Türkiyə-Ermənistan sərhədi açılacaq, İrəvanın Türkiyə və Azərbaycanla diplomatik münaqsibətlər qurması üçün perspektivi yaranacaq, Ermənistanın regional layihələrə qoşulması imkanları artacaq”.
Mürtəza
Ölkə.Az
