Bu qanunun əleyhinə səs verməklə təsəlli tapıram - Razi Nurullayev

“Son zamanlar, parlament üzvlərinin qanun layihələrinin müzakirəsində bu sayda əleyhinə səs verdiyi layihə olmamışdı. Qanun layihəsinin bu sahədə formalaşan acınacaqlı vəziyyəti daha da ağırlaşdıracağı düşüncəsindəyəm. Ona görə də “əleyhinə” səs vermişəm və fikrimi dəyişəcək dəyişikliklər görmürəm”. 

"Ölkə.Az" xəbər verir ki, bunu parlamentin bugünkü iclasında deputat Razi Nurullayev deyib.

Deputat bildirib ki, bu şəkildə qanun layihəsinin qəbul edilməsi, vətəndaşlara qarşı atılan antoqonist bir hərəkətdir:

“Bununla bərabər, dərəcələr arasında qoyulan fərqin 1 faizdən 5 faizə qaldırılmasını müsbət hal kimi dəyərləndirəm. Ən ağrılı məsələ isə əlillik və sağlamlıq imkanlarının məhdudluğunun müəyyən olunması meyarlarına dair əsasnamədə bir çox xəstəliklərin siyahıdan çıxarılmasıdır.

Bu tip qərarları Milli Məclis müzakirə etməlidir. Ümumiyyətlə, insanların taleyini müəyyən edən məsələlərlə bağlı məsələlər geniş ictimai müzakirələrdə dinlənilməli və qərarı parlament verməlidir. Çünki insanların qarşısına çıxan və ən qəddar suallara məruz qalan elə deputatlardır. Gücüm çatan məsələ isə bu qanun layihəsinin əleyhinə səs verməklə təsəlli tapmaqdır”.

Mürtəza
Ölkə.Az